Nduyo 97 - Bhaibheri Rakachena muChindau

Mwari Mutongi Mukurutu

¹ Mambo Mwari ndimambo! Nyika ngaidakare. Zviwi zvizhinji ngazvidakare.

² Makore nechidima zveshe zvinomutendenedza; kururama nokutonga kwakanaka zviri chitsimiso chedendemaro rake.

³ Muriro unobaka pamberi pake, wechipisha magaa ake anomutendenedza.

⁴ Mhene dzake dzinojekisa nyika; nyika inoona, nokuhuta.

⁵ Mitunhu inonyunguruka kudai ngenamo pamberi paMambo Mwari, pamberi paMambo Mwari wenyika yeshe.

⁶ Matenga anoteketesa kururama kwake, nevanhu veshe vanoona uthende hwake.

⁷ Veshe vanodira miedzaniso yakatsetswa vanotsverudzwa avo vanodziganzisa ngemiedzaniso; zvimwari zveshe zvinogwadama pamberi pake.

⁸ Zioni rinozwa, naro rinodakadzwa, nemadhorobha aJudha anodakadzwa, ngendaa yokutonga kwako, A Mambo Mwari.

⁹ Ngokuti iwewe, Mambo Mwari, uri mukuru padera penyika yeshe; iwewe unokudzwa kupinda zvimwari zveshe.

¹⁰ Imwimwi munoda Mambo Mwari zondai zvakashata; unongwarira mweya wevakacheneswa vake; unovanunura kubva munyara dzevakashata.

¹¹ Kujeka kunobudira vakarurama, nokudakara kunobudira vakarurama mumwoyo.

¹² Dakarai munaMambo Mwari, imwimwi vakarurama, mubonge zina rake rakachena. Nduyo.