Nduyo 90 - Bhaibheri Rakachena muChindau

BHUKU RECHIRONGOMUNA ( Nduyo 90—106 ) Mwari neVanhu

Mukumbiro waMosi, munhu waMwari

¹ Mambo Mwari, iwewe waindoiya ugaro hwedu mumibarirwana yeshe.

² Mitunhu isati yasikwa, nokuti usati wasika ivhu nenyika, iwewe ndiwe Mwari kubvira mhera nariini metsa mhera nariini.

³ Unohwirinza munhu mubukuta, wechiti, “Hwirirai, imwimwi vana vevanhu.”

⁴ Ngokuti mukuona kwako gumi remazana remakore anodai ngezuro apo apinda, nokuti kudai ngomurindo wousiku.

⁵ Unovatora kuenda kudai ngeguwe; vakadai ngokurota hope, mumangwanani vakadai ngomwenje unomusirirwa;

⁶ mumangwanani unosvipira, wechikura; madeekoni unofota nokuoma.

⁷ Ngokuti tinopedzwa ngoushungu hwako, tinotyiswa kakurutu ngoushungu hwako.

⁸ Iwewe wakaisa kushata kwedu pamberi pako, zvishaishi zvedu zvakafishika zviri mukujeka kwehope yako.

⁹ Ngokuti mazuva edu eshe anopinda ngomuushungu hwako; tinopedza makore edu kudai ngokufema.

¹⁰ Mazuva okupona kwedu makumi manomwe emakore, nokuti pamweni makumi masere emakore kuti takagwinya; kunyazwi echiwanda anotiunzira kushanda nokutambudzika; anokasira kupera nesu tinombururuka kuenda.

¹¹ Ndiani unozia simba roushungu hwako? Ushungu hwako hwakakura kudai ngokutyisa kunokusisira.

¹² Ndizvo tidzidzise kuerenga mazuva edu, kuti tiuyirwe ngomwoyo woungwaru.

¹³ Petuka, A Mambo Mwari! Metsa riini? Itira nyasha varanda vako.

¹⁴ Tigutise mumangwanani ngenyasha dzako dzinorudo, kuti tidakadzwe nokudakara mazuva edu eshe.

¹⁵ Tiite kuti tidakare kudai ngouwandu hwemazuva ewakatitambudza, nokudai ngouwandu hwemakore etakaona zvakashata.

¹⁶ Ita kuti mishando yako ioneke kunevaranda vako, nesimba routhende hwako kunevana vavo.

¹⁷ Unaku hwaMambo Mwari ngahugare padera pedu; ubudirise mushando wenyara dzedu; A, budiririsa mushando wenyara dzedu!