Nduyo 9 - Bhaibheri Rakachena muChindau

¹ Ndinozobonga Mambo Mwari ngomwoyo wangu weshe; ndinozoronza ngemishando yako yeshe inoshamisa.

² Ndinozodakara nokudakadzwa mweuri; ndinozoemba kukudza zina rako, iwewe Uri-padera-pezviro zveshe.

³ Naapo magaa angu apetuka, anozopumhunwa echipera kufa ngokuapo kwako.

⁴ Ngokuti wakaemerera kururamisa ndaa yangu; wakagara padendemaro wechitonga ngokururama.

⁵ Wakakaraidza madzinza, ukaparadza vakashata; wakatsukutidza zina ravo mhera nariini.

⁶ Magaa aparara mhera nariini; wakabvita madhorobha avo, nokukarakadzwa kwavo kwakapera.

⁷ Asi Mambo Mwari unogara ari Mambo mhera nariini, wakaemesa dendemaro rake kutonga.

⁸ Unotonga nyika ngokururama, unotonga vanhu ngokururamisa.

⁹ Mambo Mwari rusvingo rwakagwinya kunevanotambudzwa, rusvingo rwakagwinya panguva yokutambudzika.

¹⁰ Naavo vanozia zina rako vanozogonda mwouri, ngokuti iwewe, Mambo Mwari, auzi kuvasiya avo vanokutsvaka.

¹¹ Embai nduyo kukudza Mambo Mwari, uwo unogara muZioni. Teketesai zviito zvake pakati pevanhu.

¹² Uwo unounzidzira ngazi unovakarakadza; aariyarwi kuchema kwevanotambudzwa.

¹³ Ndiitire nyasha, A Mambo Mwari; ringira dambudzo rangu rendinotambudzwa ndivo vanondizonda; ndiwe umwe unondimirudza kubva pamisiwo yorufu,

¹⁴ kuti ndironze kukudzwa kwako kweshe, nokudakara muruponeso rwako mumisiwo yemwanasikana weZioni.

¹⁵ Madzinza akanzvaira muhunza yaakatsa; tsoka dzavo dzakabatwa mumumbure waakafisha.

¹⁶ Mambo Mwari wakadziziisa pachake, ngokutonga kwake kwakarurama; vakashata vanoteiwa ngemishando yenyara dzavo. Selah.

¹⁷ Vakashata vanozoenda kuSheori, madzinza eshe anoriyarwa Mwari.

¹⁸ Ngokuti vatami avazogari vechiriarikanwa, negondero revarombo arizoperi mhera nariini.

¹⁹ Miruka, A Mambo Mwari! Usatenda kuti munhu akunyise; madzinza ngaatongwe pamberi pako.

²⁰ Vatyise, A Mambo Mwari; madzinza ngaazie kuti vanhutu kwega. Selah.