Nduyo 89 - Bhaibheri Rakachena muChindau

¹ Ndinozoemba ngenyasha dzinorudo dzaMambo Mwari mhera nariini; ndinozoteketesa ngomuromo wangu kugondeka kwako kumibarirwana yeshe.

² Ndinodaidzira kuti nyasha dzako dzinorudo dzakazotsimiswa mhera nariini; kugondeka kwako kwakagwinya kudai ngematenga.

³ Wakati, “Ndaita chitenderano nowakatsanangurwa wangu, ndapika kunaDhavhidha muranda wangu:

⁴ ‘Ndinozogwinyisa rusinga rwako mhera nariini, nokuaka dendemaro rako kumibarirwana yeshe.’ ” Selah.

⁵ Matenga ngaakudze mishamiso yako, A Mambo Mwari, ugondeki hwako mumbungano yevakacheneswa.

⁶ Ngokuti ndiani uri mudenga ungatodzaniswa naMambo Mwari? Ndiani pakati pevakororo vomudenga unotodzana naMambo Mwari,

⁷ Mwari unotyisa mumbungano yevakacheneswa, mukuru unotyiwa kupinda veshe vanomutendenedza?

⁸ A Mambo Mwari, Mwari wehondo, ndiani unesimba wakadai ndiwe, A Mambo Mwari? Ugondeki hwako hunokutendenedza.

⁹ Iwewe unotonga simba roruandhle; apo mafungu arwo avheruka, unoanyaradza.

¹⁰ Iwewe wakavhunavhuna Rahabhi, kudai ngowaurawa; wakaparadza magaa ako ngomuoko wako unesimba.

¹¹ Matenga ngaako, nenyika ngeyakozve; nyika nazvo zveshe zvirimwo, ndiwe wakazvitanga.

¹² Dera nokubani ndiwe wakazvisika; Thabho naHermoni inodakara ngokukudza zina rako.

¹³ Iwewe unemuoko unesimba; nyara yako yakagwinya, nenyara yako yokumudyo yakaturama.

¹⁴ Kururama nokutonga kwakanaka zviri zvitsimiso zvedendemaro rako; nyasha dzinorudo nokugondeka zviri pamberi pako.

¹⁵ Vanomuchena vanhu avo vanozia kudaidzira kwepadhiri, vanohamba, A Mambo Mwari, mukujeka kwehope yako.

¹⁶ Vanokudza zina rako zuva reshe; vanotunhumadza kururama kwako.

¹⁷ Ngokuti iwewe uri uthende hwesimba ravo; ngenyasha dzako runyanga rwedu runotunhumadzwa.

¹⁸ Ngokuti chihlangu chedu ngechaMambo Mwari; mambo wedu kuneWakachena waIsuraeri.

Chigondiso chaMwari kunaDhavhidha

¹⁹ Zvino iwewe wakaereketa ngechioniso kunewakagondeka wako, newe ukati, “Ndaisa dzungudza padera pouwo-unesimba; ndatunhumadza umwe wakatsanangurwa kubva pakati pevanhu.

²⁰ Ndaona muranda wangu Dhavhidha; ndamudzodza ngemafuta angu akachena.

²¹ Nyara yangu inozogara naye; nomuoko wangu unozomugwinyisawo.

²² Gaa arizomubvukiri, wakashata aazomutambudzi.

²³ Ndinozopwanyira magaa ake pamberi pake, nokuputsira pashi avo vanomuzonda.

²⁴ Ugondeki hwangu nenyasha dzangu dzinorudo dzinozogara naye; nomuzina rangu runyanga rwake runozotunhumadzwa

²⁵ Ndinozoemesa nyara yake padera poruandhle, nenyara yake yokumudyo padera perwizi.

²⁶ Aye unozodaidzira kwendiri kuti, ‘Iwewe ndiwe baba angu, Mwari wangu webuwe roruponeso rwangu.’

²⁷ Ndinozomuita dangwe, mukuru wemadzimambo eshe omunyika.

²⁸ Mhera nariini ndinozomungwaririra nyasha dzangu dzinorudo, nechitenderano changu kwaari chinozoema chakagwinya.

²⁹ Ndinozoemesa mibarirwana yake mhera nariini, nedendemaro rake kuti rigare riripo kudai ngematenga.

³⁰ Kudai vana vake vechizorekera mipango yangu, vasikahambi muzvitongero zvangu,

³¹ kudai vechizogura zviemeso zvangu, vasikangwariri mipango yangu,

³² zvino ndinozoorora kushaisha kwavo ngendonga, nokushata kwavo ngemboma.

³³ Asi andizodusi kubva kwaari nyasha dzangu dzinorudo, nokuti kukorera mukugondeka kwangu.

³⁴ Andizoguri chitenderano changu, nokuti kupindura izwi iro rendakaereketa ngomuromo wangu.

³⁵ Kamwe kega ndakapika ngokuchena kwangu; andizonyepi kunaDhavhidha.

³⁶ Mibarirwana yake inozogara mhera nariini, nedendemaro rake rinozogara kudai ngezuva pamberi pangu.

³⁷ Rinozogwinyiswa mhera nariini kudai ngomwedzi, chapupu chinogondeka chiri mugore.” Selah.

Kuchema ngoKunyiswa kwaMambo

³⁸ Asi zvino wamudzinga nokumuramba, wazara ngoushungu wokurwa newakadzodzwa wako.

³⁹ Wagura chitenderano nomuranda wako; wasvipisa dzungudza rake mubukuta.

⁴⁰ Wapwanyira pashi marukumbati ake eshe; waparadza rusvingo rwake kuita matongo.

⁴¹ Veshe vanopinda vanomuchakata; waita chitsverudzo kuvaakirwana vake.

⁴² Iwewe wamirudza nyara yokumudyo yemagaa ake; waita kuti magaa ake eshe adakare.

⁴³ Zve, wafondora muromo weshoti yake, auzi kumugwinyisa mukurwa hondo.

⁴⁴ Wadusa ndonga kubva munyara yake, nokuputsira pashi dendemaro rake.

⁴⁵ Wafupisa mazuva outsva hwake; wamufukidza ngokutsveruka. Selah.

Mukumbiro woKununurwa

⁴⁶ A Mambo Mwari, metsa riini? Unozodzifisha mhera nariini? Ushungu hwako hunozobaka kudai ngomuriro mukuwo wakaitawani?

⁴⁷ A, karakadza ufupi hwomukuwo wangu. Chironyi chisina shwiro chowakasikira vakororo vevanhu!

⁴⁸ Ndiani munhu ungakona kupona usikazooni kufa? Ndiani ungakona kutiza simba reSheori? Selah.

⁴⁹ Mambo Mwari, dziri pari nyasha dzako dzinorudo dzekaretu, idzo ngokugondeka kwako wakapika kunaDhavhidha?

⁵⁰ Karakadza, Mambo Mwari, kutsverudzwa kwomuranda wako; kuti matwarirenyi endinoita paditi pangu zvituko zveshe zvevanhu vazhinji.

⁵¹ Icho magaa ako akashoora ndicho, A Mambo Mwari, chaakashoora ndicho tsoka dzowakadzodzwa wako.

⁵² Ngaabongwe Mambo Mwari mhera nariini. Ameni naAmeni.