Nduyo 86 - Bhaibheri Rakachena muChindau

¹ Ungamisira nzee yako, A Mambo Mwari, undipingure, ngokuti ndiri murombo nomutami.

² Ngwarira mweya wangu, ngokuti ndakaemeserwa iwewe; ponesa muranda wako unogondeka mwouri. Iwewe ndiwe Mwari wangu;

³ ndiitire nyasha, A Mambo Mwari, ngokuti ndinochema kwouri zuva reshe.

⁴ Dakadza mweya womuranda wako, ngokuti ndinomirudzira mweya wangu kwouri, A Mambo Mwari.

⁵ Ngokuti iwewe, Mambo Mwari, wakanaka unokukungurira, unowanzisa nyasha dzinorudo kuneavo veshe vanokumbira kwouri.

⁶ Izwa mukumbiro wangu, A Mambo Mwari; upurutane izwi rokupota kwangu.

⁷ Ngezuva rokutambudzika kwangu ndinozokumbira kwouri, ngokuti iwewe unozondipingura.

⁸ Akuna wakadai ndiwe, A Mambo Mwari, pakati pezvimwari, nokuti akuna mishando yakadai ngemishando yako.

⁹ Madzinza eshe owakasika anozouya agwadame pamberi pako, A Mambo Mwari. Anozokudza zina rako.

¹⁰ Ngokuti iwewe uri mukuru, unoita zviro zvinoshamisa; ndiwe Mwari wega.

¹¹ Ndidzidzise njira yako, A Mambo Mwari, kuti ndihambe mugwinyiso rako; ndipe mwoyo usikazi kupaurwa kuti nditye zina rako.

¹² Ndinokubonga, A Mambo Mwari, Mwari wangu, ngomwoyo wangu weshe. Ndinozokudza zina rako mhera nariini.

¹³ Ngokuti nyasha dzako dzinorudo ihuru kwendiri; iwewe wakanunura mweya wangu kubva muudzamu hweSheori.

¹⁴ A Mwari, vanodzikudza vanondimukira, nembungano yemadzongoni inotsvaka mweya wangu, avazi kukuisa pamberi pavo.

¹⁵ Asi iwewe, A Mambo Mwari, ndiwe Mwari unenyasha dzakawanda nokukungurira, aukasiri kunyangadzwa, unowanza nyasha dzinorudo nokugondeka.

¹⁶ Kunukukira kwendiri, undiitire nyasha; ipa simba rako kumuranda wako; ponesa mukororo womurandakadzi wako.

¹⁷ Ndionise chioniso chokunaka kwako, kuti avo vanondizonda vachione, vatsveruke, ngokuti iwewe, Mambo Mwari, wakandidetsera, ukandiembedzera. Nduyo yeVakororo vaKhora. Ngoma.