Nduyo 85 - Bhaibheri Rakachena muChindau

¹ Mambo Mwari, wakaitira nyasha nyika yako; iwewe wakahwirinza upfumi hwaJakobe.

² Wakakungurira kushata kwevanhu vako; wakarekera kushaisha kwavo kweshe. Selah.

³ Wakadusa ushungu hwako hweshe; wakadzikunukudza kubva muushungu hwako hunopisha.

⁴ Tipetudzeizve, A Mwari woruponeso rwedu, dusa ushungu hwako huri kwetiri.

⁵ Unozotitsenekera mhera nariini? Unozogumisa ushungu hwako kumibarirwana yeshe here?

⁶ Auzotimusiririzve here, kuti vanhu vako vadakare mweuri?

⁷ Tionise nyasha dzako dzinorudo, A Mambo Mwari, tipei ruponeso rwako.

⁸ Ngandizwe zvaanoereketa Mwari, Mambo Mwari, ngokuti unozoereketa kunyarara kunevanhu vake, kunevakagondeka vake, kwevari vanokunukukira kwaari mumwoyo yavo.

⁹ Ngegwinyiso ruponeso rwake ruri pasinde kwevari vanomutya, kuti uthende hwake hugare munyika yedu.

¹⁰ Nyasha dzinorudo negwinyiso zvinozoshongana; kururama nokunyarara zvichachingamidzana ngomuromo.

¹¹ Kugondeka kunozomera kubva pashi, nokururama kunozoringira pashi kubva mudenga.

¹² Mambo Mwari unozopa izvo zvakanaka, nenyika yedu inozowanza zviyo zvayo.

¹³ Kururama kuchamutungamirira; kunozonasira njira yezvitsiko zvake. Mukumbiro waDhavhidha.