Nduyo 84 - Bhaibheri Rakachena muChindau

¹ Kunakanyi kwendau yougaro hwako, A Mambo Mwari wehondo!

² Mweya wangu unodisisa ngegwinyiso unopera simba ngoruwanze rwengome dzaMambo Mwari; mwoyo wangu nenyama yangu zvinoemba ngokudakara kunaMambo Mwari unopona.

³ Kunyazwi chiwanzaburi chinodzionera mhatso, nemherepere inodzionera chisaki chokuberekera vana vayo, pamaarita ako, A Mambo Mwari wehondo, Mambo wangu naMwari wangu.

⁴ Vanomuchena avo vanogara mumhatso mwako; vanozogara vechiemba kukukudza. Selah.

⁵ Vanomuchena vanhu avo simba ravo riri mwouri, avo mumwoyo mwavo munemapato anoenda Zioni.

⁶ Vechipinda kuhamba ngomubani rakaoma, vanoriita ndau dzezvinyuka; mvura yokutanga inorifukidza ngemakandwa.

⁷ Vanoenda kubva pasimba kuenda pasimba; Mwari wezvimwari unozooneka muZioni.

⁸ A Mambo Mwari, Mwari wehondo, izwa mukumbiro wangu; purutana, A Mwari waJakobe. Selah.

⁹ Ringira, A Mwari, chihlangu chedu; wona hope yowakadzodzwa wako.

¹⁰ Ngokuti zuva rimwe mungome dzako rakapinda kunaka kunegumi remazana (1,000) amweni. Ndingada kuita murindi wepamusiwo wemhatso yaMwari wangu, panekugara mumatende okushaisha.

¹¹ Ngokuti Mambo Mwari, Mwari izuva nechihlangu; Mambo Mwari unoita nyasha nouthende. Mambo Mwari aanyimi chiro chakanaka kuneavo vanohamba ngokururama.

¹² A Mambo Mwari wehondo, unomuchena munhu uwo unogonda mwouri. KuneMutungamiriri woKuemba. Nduyo yevakororo vaKhora.