Nduyo 81 - Bhaibheri Rakachena muChindau

¹ Embai ngokudaidzisa kunaMwari wesimba redu; mudaidzire ngokudakara kunaMwari waJakobe.

² Embai nduyo, muridze ngoma yesimbi, mbira dzinodakadza, nechidangari.

³ Ridza hwama ngenguva yokutawa kwomwedzi mutsva, nepakuchena kwomwedzi, pazuva redhiri redu.

⁴ Ngokuti ichi chiemeso chaIsuraeri, chitongero chaMwari waJakobe.

⁵ Wakachiemesa kunaJosefa kuita chapupu, apo paakabuda koorwa neEgipite. Ndinozwa izwi rendisikazi kumbozia:

⁶ “Ndakadusa mutwaro kubva papfudzi rake; nyara dzake dzakasunhurwa kubva kuchitundu.

⁷ Mukutambudzika wakadaidza neni ndakakununura; ndakakupingura ndiri muugaro hwakasitika hwokutinhira; ndakakuedza pamvura yeMeribha. Selah.

⁸ Izwai, imwimwi vanhu vangu, apo pendinomupanga; A Isuraeri, kudai waizotenda kupurutana kwendiri!

⁹ Akuzoapo chimwari chipara pakati penyu; amuzogwadami pashi kunechimwari chipara.

¹⁰ Inini ndini Mambo Mwari, Mwari wenyu, uwo wakamubudisa kubva munyika yeEgipite. Nasa kushama muromo wako neni ndinozouzadza.

¹¹ Asi vanhu vangu avazi kupurutana izwi rangu; Isuraeri aazi kuda kudzipfaisa kwendiri.

¹² Ndizvo ndakavatendera kuti vahambe kudai ngokutindiara kwemwoyo yavo, kuti vahambe kudai ngokuda kwavo.

¹³ A, kudai vanhu vangu vaizopurutana kwendiri, kudai Isuraeri aizohamba munjira dzangu!

¹⁴ Zvino ndaizokasira kunyisa magaa avo, ndikunukudze nyara yangu kurwa nemagaa avo.

¹⁵ Avo vanozonda Mambo Mwari vanozodzipfaisa kwaari, nokuororwa kwavo kunozogara mhera nariini.

¹⁶ Ndingadai ndaimuburira ngekoroni yakapindisisa kunaka, neuchi hunobva mubuwe ndinozomugutisa.” Nduyo yaAsafi.