Nduyo 80 - Bhaibheri Rakachena muChindau

¹ Izwa, A muushi waIsuraeri, iwewe unotungamirira Josefa kudai ngomutanga! Iwewe wakagadzikwa padendemaro padera pemakherubhi, jeka

² pamberi paEfuremu, Bhenjamini naManase. Musa ukuru hwako, uuye kooponesa.

³ Tiunzezve, A Mwari; hope yako ngaijeke, kuti isusu tiponeswe.

⁴ A Mambo Mwari wehondo, unozotsenekera mukumbiro wevanhu vako nguva yakadini?

⁵ Wavagutisa ngechingwa chemisodzi, wavapa misodzi yakawanda kuti vamwe.

⁶ Unotiita chituko kunevaakirwana vedu; nemagaa edu anosheka pakati pawo.

⁷ Tiunzezve, A Mwari wehondo; hope yako ngaijeke, kuti isusu tiponeswe.

⁸ Iwewe wakaunza muvhini kubva Egipite; wakadzinga madzinza, ukausima.

⁹ Wakaurimira munda, wakatsira nzinde ukazadze nyika.

¹⁰ Mitunhu yakatibikirwa ngebvute rawo, misidhare yakagwinya nematai awo.

¹¹ Wakatambararira matai awo kuruandhle, nemharikirwa dzawo dzakaguma kuRwizi.

¹² Wakaputsira pashi ngenyi marushosha awo, kuti veshe vanopinda ngenjira vakaye michero yawo?

¹³ Nguruve inobva mugwasha inouvhuruvhurudza, nemhuka dzomushango dzinoudya.

¹⁴ Uyazve, tapota, A Mwari wehondo; ringira pashi, uri mudenga, newe uone; uhambire uyu muvhini,

¹⁵ ungwarire guri rawo rakasimwa ngenyara yako yokumudyo.

¹⁶ Vakaupisha ngomuriro, vakautemera pashi; vanopera ngokukaraidza kwehope yako.

¹⁷ Asi nyara yako ngaiyapo padera pomunhu uri kunyara yako yokumudyo, padera pomukororo womunhu wowakagwinyisa kuita wako.

¹⁸ Zvino isusu atizohwiriri sure kubva kwouri; tipe kupona, nesu tinozodaidza zina rako.

¹⁹ Tiunzezve, A Mambo Mwari, Mwari wehondo; hope yako ngaijeke, kuti isusu tiponeswe. KuneMutungamiriri woKuemba. Nduyo yaAsafi.