Nduyo 78 - Bhaibheri Rakachena muChindau

¹ Purutanai, vanhu vangu, kudzidzisa kwangu; ungamisai nzee dzenyu kumazwi omuromo wangu.

² Ndinozoshama muromo wangu kuereketa miedzaniso; ndinozoereketa zvisana zvakafishika zvekaretu,

³ zviro zvetakazwa nezvetakazia, izvo madzibaba edu akatironzera.

⁴ Atizofishiri vana vavo; tinozoronzera mibarirwana inoteera kukura kwemishando yaMambo Mwari, nesimba rake nezviito zvake zvinoshamisa zvaakaita.

⁵ Wakagwinyisa mutemo munaJakobe, akaemesa mupango muIsuraeri, uwo waakapanga madzibaba edu, kuti vadzidzise vana vavo;

⁶ kuti mibarirwana inoteera izvizie, vana vasati vabarwa, nokumiruka, nokuronzera vana vavo,

⁷ kuti vaise gonda ravo munaMwari, kuti vasariyarwa mishando yaMwari, asi kuti vangwarire mipango yake;

⁸ kuti vasadai ngemadzibaba avo, mubarirwana usikazwi nounomukira, mubarirwana usikazii kururama mumwoyo yawo, uwo mweya wawo usikazi kugondeka kunaMwari.

⁹ Vana vaEfuremu, vanezvokurwa ndizvo, vanembita, vakakunukuka kupetuka ngezuva rokurwa.

¹⁰ Avazi kungwarira chitenderano chaMwari, asi vakaramba kuhamba mumipango yake.

¹¹ Vakariyarwa mishando yake, nezviito zvake zvinoshamisa zvaaiya avaonesa.

¹² Wakaita zviro zvinoshamisa mukuona kwemadzibaba avo, munyika yeEgipite, murubaya rweZoani.

¹³ Wakapaura ruandhle, akavapindisa ruseri; wakaita kuti mvura ieme kuita murwi.

¹⁴ Masikati wakavatungamirira ngegore, nousiku hweshe wakavatungamirira ngokujeka kwomuriro.

¹⁵ Wakamwesa mapuwe mushango, akavapa kumwa kwakawandisa kudai ngemvura inobva mwakadzama.

¹⁶ Wakanyusa ndwizi kubva mubuwe, akaita kuti mvura ipopome kudai ngendwizi.

¹⁷ Asi vakaangirazve kumushaishira, kumukira Uwo-Uripadera-pezveshe, vari mushango.

¹⁸ Vakaedza Mwari mumwoyo yavo ngokukumbira kudya kwevaidisa.

¹⁹ Vakaereketa kutuka Mwari, vakati, “Mwari unganasira hwarasanza mushango here?

²⁰ Kunyazwi wakachaya buwe, kuti mvura ibude, nendwizi dzakapopoma, ungapazve chingwa here, nokuti kupa vanhu vake nyama here?”

²¹ Ndizvo apo Mambo Mwari paakazwa, wakazara ngoushungu; nomuriro wakabasirirwa Jakobe, ushungu hwake hwakamukira Isuraeri,

²² ngokuti vaiya vasina gonda munaMwari, avazi kugondazve simba roruponeso rwake.

²³ Asi wakapanga makore omudenga, akabeura misiwo yomudenga;

²⁴ wakavarigira mana yokudya, akavapa kudya kwomudenga.

²⁵ Vanhu veshe vakadya chingwa chengirosi; wakavatumira kudya ngokuwanzisa.

²⁶ Wakaita kuti dutu rokumabvazuva ripepete mumatenga; ngesimba rake wakatungamirira dutu rokubani;

²⁷ wakanaisa nyama yakawanda kudai ngebukuta, neshiri dzakawanda dzinemaphaphiro, kudai ngejecha roruandhle.

²⁸ Wakadzinaisa mukati mwekamba ravo, dzechitendenedza ugaro hwavo.

²⁹ Navo vakadya vakaguta yaamho, ngokuti wakavapa chidisiso chavo.

³⁰ Asi vasati vagutisa chidisiso chavo, nyama ichimwo mumiromo yavo,

³¹ ushungu hwaMwari hwakabaka padera pavo, hukauraya vakapinda kugwinya pakati pavo, nokuparadza vanhu vatsva vaIsuraeri.

³² Kunyazwi zvakadaro, vakaangira kushaisha, avazi kutenda mishando yake inoshamisa.

³³ Ndizvo wakaita kuti mazuva avo apere ngokukasira, nemakore avo mukutya.

³⁴ Naapo paakavauraya, vakamutsvaka; vakatenderuka, vakatsvaka Mwari ngokugwinyisira.

³⁵ Vakakarakadza kuti Mwari ndiye buwe ravo, Mwari Uripadera-pezveshe muripiri wavo.

³⁶ Asi vakamutunhumadza ngemiromo yavo; vakamunyepera ngorurumi rwavo.

³⁷ Mwoyo yavo aizi kutseyama paari; vaiya vasikazi kugondeka kuchitenderano chake.

³⁸ Asi waiya nenyasha, wakarekerera kushaisha kwavo, aazi kuvauraya; wakakunukudza ushungu hwake nguva zhinji, aazi kumusa ushungu hwake hweshe.

³⁹ Wakakarakadza kuti vaiya nyama, dutu rinopinda, risikachauyizve.

⁴⁰ Nguva dzakawanda vakamumukira mushango, vakamutambudza mushango musina mvura.

⁴¹ Vakaedzazve Mwari, vakanyangadza Wakachena waIsuraeri.

⁴² Avazi kukarakadza simba rake nokuti zuva apo paakavaripira kubva kugaa;

⁴³ apo paakaonesa zvioniso zvake muEgipite, nemishamiso yake mushango reZoani.

⁴⁴ Wakapindura ndwizi dzavo dzikaita ngazi, kuti vasakona kumwa kubva mumarwizi avo.

⁴⁵ Wakatumira nhunzi pakati pavo dzakawanda, dzakavadya, nemachedye, akavaparadza.

⁴⁶ Zvisimwa zvavo zvakapuwa mbunga, nezvevakashandira wakazvipa ndongwe.

⁴⁷ Wakaparadza mivhini yavo ngematsanza, nemionde yavo ngechando.

⁴⁸ Wakaparadza zvifuyo zvavo ngematsanza, nemitanga yavo yakaparadzwa kakurutu ngemheni.

⁴⁹ Wakaisa padera pavo kutyisa kwoushungu hwake, ushungu, kushishwa, nedambudzo, chikwata chengirosi dzokuparadza.

⁵⁰ Wakanasirira ushungu hwake njira; aazi kuponesa mweya yavo kubva mukufa, asi wakakovera ndaramo yavo mudenda guru.

⁵¹ Wakauraya matangwe eshe muEgipite, vokuamba kwesimba ravo mumatende aHamu.

⁵² Zvino wakatungamirira vanhu vake kudai ngemapwizhi, akavausha mushango kudai ngezvifuyo.

⁵³ Wakavatungamirira ngokungwaririka, ndizvo avazi kutya; asi ruandhle rwakambonya magaa avo.

⁵⁴ Wakavaunza kumutunhu wake wakachena, kudunhu iri raakatora ngenyara yake yokumudyo.

⁵⁵ Wakadzinga madzinza pamberi pavo; akavakoanisira kuita nhaka nokugarisa madzinza aIsuraeri mumatende awo.

⁵⁶ Asi vakaedza Mwari Uripadera-pezveshe, vakamumukira. Avazi kungwarira mitemo yake,

⁵⁷ asi vakakunukukira sure, vakaita vasikagondi kudai ngemadzibaba avo; vakapauka vakaita kudai ngouta wakagoba.

⁵⁸ Ngokuti vakamuita kuti anyangadzwe ngendau dzavo dzakakwirira; vakamuita kuti aite ndurumwa ngemiedzaniso yakatsetswa.

⁵⁹ Naapo Mwari azvizwa, wakazara ngoushungu, wakaramba Isuraeri kakurutu.

⁶⁰ Wakasiya ugaro hwake paShiro, tende iro raaigara pakati pevanhu,

⁶¹ naye wakakovera simba rake kuubatwa, uthende hwake kunyara yegaa.

⁶² Wakakovera vanhu vake kushoti, nokubeurira ushungu hwake kunhaka yake.

⁶³ Muriro wakapedza majaha avo, nemhandwe dzavo dzaiya dzisina ngoma yokuroorwa.

⁶⁴ Vapristi vavo vakawa ngeshoti, neshirikadzi dzavo adzizi kuchema.

⁶⁵ Zvino Mambo Mwari wakamuka kudai ngomunhu wamuka muhope, kudai ngetsvisi rinodaidzira ngendaa yevhini.

⁶⁶ Wakaita kuti magaa ake atize; wakaaisa mukutsverudzwa kusikaperi.

⁶⁷ Wakaramba tende raJosefa, aazi kutsanangura rusinga rwaEfuremu;

⁶⁸ asi wakatsanangura rusinga rwaJudha, Dunhu reZioni raakada.

⁶⁹ Wakaaka ndau yake yakachena, kudai ngematenga akakwirira, kudai ngenyika yaakatsimisa mhera nariini.

⁷⁰ Wakatsanangura Dhavhidha muranda wake, akamutora kubva mudanga remapwizhi;

⁷¹ wakamuunza kubva mukuusha mapwizhi anevana vawo, kuita muushi wevanhu vake Jakobe, waIsuraeri nhaka yake.

⁷² Ngomwoyo wakarurama wakavausha; akavatungamirira ngoungwazi hwenyara dzake. Nduyo yaAsafi.