Nduyo 76 - Bhaibheri Rakachena muChindau

¹ Mwari unoziikanwa muJudha, zina rake iguru muIsuraeri.

² Tende rake rakaemeswa muSaremu, nougaro hwake huri muZioni.

³ Naapo wakagura misee youta yaibaka, chihlangu, shoti nezvokurwisa hondo. Selah.

⁴ Iwewe unouthende, hwakapinda kunaka kunemitunhu yemhera nariini.

⁵ Vakatsunga mwoyo vakatorerwa zvakachakatwa zvavo; vakaata hope; akuna naumwe wevarwi wakakona kumirudza nyara.

⁶ Pakukaraidza kwako, A Mwari waJakobe, veshe mugadhi nehachi zvagumirwa ngehope dzorufu.

⁷ Asi, iwewe ngegwinyiso unotyisa! Ndiani ungaema pamberi pako apo ushungu hwako hwabaka?

⁸ Wakaita kuti kutonga kuzwike kwechibva mudenga; nyika yakatya ikanyarara,

⁹ apo Mwari paakamiruka kutonga, kuponesa veshe vakatsikirirwa vomunyika. Selah.

¹⁰ Ngegwinyiso ushungu hwevanhu hunoshanda kukukudza kwega, naapo woosunga zvokugumisira zvoushungu hwako kudzitendenedza.

¹¹ Pikai mhiko kunaMambo Mwari, Mwari wenyu mudziripe; veshe vanomutendenedza ngavaunze zvipo kunouwo unotyiwa,

¹² uwo unotema mweya yevatongi, uwo unofemera kutya kunemadzimambo enyika. KuneMutungamiriri Wokuemba. KunaJedhuthuni. Nduyo yaAsafi.