Nduyo 74 - Bhaibheri Rakachena muChindau

¹ A Mwari, ngenyi wechitirasha mhera nariini? Ngenyi ushungu hwako hwechipwititika kuita chiushi kurwisana nemapwizhi embusho yako?

² Karakadza mbungano yako yowakatenga kare kare, yowakaripira kuita dzinza renhaka yako. Karakadza Mutunhu weZioni mwowakagara.

³ Mirudza tsoka dzako kuhamba mumatongo anogara akadaro; gaa raparadza zviro zveshe zviri mundau yakachena.

⁴ Magaa ako akabhonga mukati mwendau yako yakachena; vakaemesa mijeki yavo kuita zvioniso.

⁵ Pamusiwo wedera vakatema miti yakatsikana ngemasanho.

⁶ Nazvino vanopwanyira pashi ngesanho nehamera mushando weshe wayo wakatsetswa.

⁷ Vakapisha mhatso yako yakachena ngomuriro; vakasvipisa ndau yougaro hwezina rako ngokuuriga pashi.

⁸ Vakati mumwoyo yavo, “Tinozovapedza yaamho.” Vakapisha ndau dzeshe dzokushongana dzaMwari dziri munyika.

⁹ Atichaoni zvioniso zvedu; akuchina muprofeti; apachina naumwe pakati pedu unozia kuti inguva yakadini.

¹⁰ Mukuwo wakareba zvakadini, A Mwari, gaa rechimushoora? Gaa rinozotuka zina rako mhera nariini here?

¹¹ Ngenyi wechifisha nyara yako? Ngenyi wechiisa nyara yako yokumudyo paditi rako?

¹² Asi Mwari ndiye Mambo wangu kubvira karetu, unoshanda ruponeso mukati mwenyika.

¹³ Iwewe wakapaura ruandhle ngesimba rako guru; wakapwanya masoro ezvikara zvomurandhle.

¹⁴ Wakapwanya masoro ezvikara kuita zvigurwa, wakapa kuita kudya kwezvisikwa zvomushango.

¹⁵ Wakabeura miromo yezvinyuka neguwe; wakaomesa ndwizi huru.

¹⁶ Masikati ngaako, nousiku ngohwakozve; iwewe wakaita kujeka nezuva.

¹⁷ Wakaemesa migano yeshe yenyika; wakaita zienza nechando.

¹⁸ Karakadza ichi, Mambo Mwari, kuti gaa rinotsverudza, rinokusheka, nokuti vanhu vanoupenzi vanotuka zina rako.

¹⁹ Usakovera mweya wegora rako kumhuka dzomushango; usariyarwa ndaramo yevarombo vako mhera nariini.

²⁰ Karakadza chitenderano chako, ngokuti ndau dzechidima dzenyika dzakazara ngougaro hwokugebenga.

²¹ Usatendera kuti unotambudzwa atsverudzwe; tendera murombo nomutami vakudze zina rako.

²² Miruka, A Mwari, urwire ndaa yako; karakadza njira yaanokutsverudza ndiyo zuva reshe munhu uri benzi.

²³ Usariyarwa hohoho yemagaa ako, bope revanokumukira rinogara rechikwira. KuneMutungamiriri woKuemba: Usaparadza. Nduyo yaAsafi.