Nduyo 73 - Bhaibheri Rakachena muChindau

BHUKU RECHITATU ( Nduyo 73—89 ) Kutonga Kwakarurama kwaMwari

Nduyo yaAsafi

¹ Ngegwinyiso Mwari wakanaka kunaIsuraeri, kwavari avo vakacheneswa mumwoyo.

² Asi inini, tsoka dzangu dzaiya dzooda kupumhunwa; zvitsiko zvangu zvaiya zvooda kutedzuka.

³ Ngokuti ndaiya nendurumwa ngevanodzikudza; ndakaona kugarisika kwevakashata.

⁴ Ngokuti avana kurwadziwa miiri yavo; yakagwinya inesimba.

⁵ Avatambudziki kudai ngevamweni; avatambudzwi kudai ngevanhu vamweni.

⁶ Ndizvo kudzikudza iketani yemuhuro mwavo; ugebenga hunovafukidza kudai ngechokufuka.

⁷ Madziso avo anozvimba ngokukora; mwoyo yavo inofashukira ngezvoupenzi.

⁸ Vanoita jee, vanoereketa ngezviro zvakashata; vanoereketa kudzitunhumadza nokuronga kutsikirira.

⁹ Vanotununisa miro yavo kurwa nedenga, norurumi rwavo runohamba munyika.

¹⁰ Ndizvo vanhu vanopetuka vechivakudza, vasikaoni kushata mwevari.

¹¹ Navo vanoti, “Mwari ungakona kuzia ngenjiranyi? Kuriyo kuzia kwaari Uri muDenga Denga here?”

¹² Ringira, ava ndivo vakashata; ngokuti vanogara vechigarisika, vanowandisa upfumi hwavo.

¹³ Pasina shwiro ndakachenesa mwoyo wangu, ndikashamba nyara dzangu ngokuti ndaiya ndisina ndaa.

¹⁴ Ngokuti mutakatiro wezuva reshe ndaitambudzwa, ndaiororwa mangwanani eshe.

¹⁵ Kudai ndakati, “Ndinozoereketesa kudaro ngenjira iyi,” ndaizoita munyepi kumibarirwana yevana vako.

¹⁶ Asi apo ndakakarakadza kuti ndingaita maziirenyi izvi, wakaoneka kwendiri uri mushando wakakonza,

¹⁷ metsa ndakapotera mumhatso yaMwari yakachena; naapo ndakazwisisa kupera kwavo.

¹⁸ Ngegwinyiso wakavaemesa muugaro hunotedza; unovasukumidzira pashi kuti vapere.

¹⁹ I! Vaparadzwa ngekamukuwo kadoko, vanopedzwa yaamho ngemaharura.

²⁰ Kudai ngokurota apo munhu amuka; ngokudaro, A Mambo Mwari, pakumuka, unoshoora muemo wavo.

²¹ Naapo mweya wangu waitambudzika, ndakabaiwa mumwoyo wangu,

²² ndaiya benzi ndisikazii chiro; ndaiya ndakadai ngechikara pamberi pako.

²³ Zvakanyadaro ndinoangira kugara ndinewe; unondibata ngenyara yangu yokumudyo.

²⁴ Unonditungamira ngemipango yako, ngesure kweizvi unozondiashira muuthende.

²⁵ Ndinaani mudenga, asi iwewe? Nepashi apana chiro chendinodisisa ngokubanze kwako.

²⁶ Nyama yangu nomwoyo wangu zvinokorera, asi Mwari uri simba romwoyo wangu, nechikoaniswa changu mhera nariini.

²⁷ Ngegwinyiso avo vari kuretu newe vanozopera; unoparadza veshe vasikagondeki kwouri.

²⁸ Asi kwendiri kwakanaka kuti ndigare pasinde naMwari; ndaita Mambo Mwari, Mwari, bako rangu rokuhwara, kuti nditeketese mishando yako yeshe. Nduyo yaAsafi.