Nduyo 71 - Bhaibheri Rakachena muChindau

Mukumbiro woMunhu Musharuka

¹ Mambo Mwari, ndinohwara mwouri; usatenda kuti nditsverudzwe mhera nariini.

² Ndisunhure mukururama kwako undinunure: ungamisira nzee yako kwendiri, undiponese.

³ Ita buwe rokuhwara kwendiri, rusvingo rwakagwinya, kundiponesa; ngokuti iwewe uri buwe rangu norusvingo rwangu.

⁴ Mwari wangu, ndinunure kubva munyara yowakashata, kubva munyara yousikazi kururama, nousina nyasha.

⁵ Ngokuti iwewe, Mambo Mwari, uri gonda rangu, nemagondero angu, A Mambo Mwari, kubvira muutsva hwangu.

⁶ Ndakatseyama padera pako kubvira mukubarwa kwangu; ndiwe wakandibudisa kubva mundani yamai angu. Kukudza kwangu kunozogara kuri kwako.

⁷ Ndagara ndakadai ngechishamiso kunevazhinji, asi iwewe uri bako rangu rokuhwara rakagwinya.

⁸ Muromo wangu wakazadzwa ngokukudzwa kwako, noukuru hwako, zuva reshe.

⁹ Usandirasha ngenguva yousharuka; usandisiya apo simba rangu rapera.

¹⁰ Ngokuti magaa angu anoereketa ndini, naavo vanohwarira mweya wangu vanoita bangano vari pamwepo.

¹¹ Vanoti, “Mwari wamusiya; murumbirirei mumubate, ngokuti akuna wokumununura.”

¹² A Mwari, usanditaraukira; A Mwari wangu, kasira kundidetsera.

¹³ Ngavatsverudzwe vapetudzwe, avo vanoitira ndaa mweya wangu; avo vanotsvaka kundiremadza ngavafukidzwe ngechituko nokutsverudzwa.

¹⁴ Asi inini ndinozogara ndechigonda, ndinozokukudza nokukukudza.

¹⁵ Muromo wangu unozoereketa ngokururama kwemishando yako, nemishando yako yoruponeso zuva reshe, kunyazwi uwandu hwavo hwakawanda kupinda ruziyo rwangu.

¹⁶ Ndinozouya ndechikudza kugwinya kwemishando yaMambo Mwari, Mwari; ndinozokudza kururama kwako, kwako kwega.

¹⁷ A Mwari, wakandidzidzisa kubvira muutsva hwangu, nanyamashi ndinoteketesa mishando yako inoshamisa.

¹⁸ Ndizvo kunyazwi nomuusharuka, nokuchena imvi, A Mwari, usandisiya, metsa ndateketesa simba rako kunemibarirwana ichauya. Simba rako

¹⁹ nokururama kwako, A Mwari, kunogumira matenga akaturama. Iwewe wakaita zviro zvikuru, A Mwari, ndiani wakadai ndiwe?

²⁰ Iwewe wakandiita kuti ndione madambudziko akawanda anorwadza, unozondimusazve; kubva muudzamu hwenyika unozondipetudzazve.

²¹ Unozowandisa ukuru hwangu, nokundiembedzerazve.

²² Ndinozokukudzawo ngechimadangari, ngendaa yougondeki hwako, A Mwari wangu. Ndinozoemba kukukudza ngembira, iwewe Wakachena Umwe waIsuraeri.

²³ Miromo yangu inozodaidzira ngokudakara, apo pendinoemba kukukudza; mweya wanguwo uwo wewakanunura.

²⁴ Rurumi rwanguzve runozoereketa ngorudetso rwokururama kwako mutakatiro wezuva reshe, ngokuti avo vanotsvaka kundiremadza, vatsverudzwa nokukangaidzwa. Nduyo yaSoromoni.