Nduyo 7 - Bhaibheri Rakachena muChindau

¹ A Mambo Mwari, Mwari wangu, ndinohwara mwouri; ndiponese kubva kuneavo veshe vanondirumbirira, undinunure,

² nokuti kudai ngemhondoro vanozonditatura, vechindikweya, pasina wokununura.

³ A Mambo Mwari, Mwari wangu, kudai ndaita ichi, kudai kuripo kushata munyara dzangu,

⁴ kudai ndaunzidzira ngezvakashata kuneuwo waigarisana neni, nokuti kuchakata gaa rangu pasina ndaa,

⁵ zvino gaa ngarindirumbirire rindibate, ngaritsikatsike ndaramo yangu mumavhu, riise mweya wangu mubukuta. Selah.

⁶ Miruka, Mambo Mwari, muushungu hwako; dzimirudze pachako kurwisana noushungu hwemagaa angu; muka, A Mwari wangu; wakaemesa kutonga.

⁷ Mushongano wevanhu ngaukuunganire, nepadera pavo gara padendemaro rako.

⁸ Mambo Mwari unotonga vanhu; nditonge, A Mambo Mwari, kudai ngokururama kwangu, nokudai ngegwinyiso riri mukati mwangu.

⁹ A kushata kwevakashata ngakupere, asi iwewe gwinyisa vakarurama, A Mwari wakarurama, iwewe uwo unoedza mipinimidzo nomwoyo.

¹⁰ Mwari chihlangu changu uwo unoponesa vakarurama mumwoyo.

¹¹ Mwari mutongi wakarurama, naMwari unotsenekera vakashata mazuva eshe.

¹² Kudai munhu asikatenderuki, Mwari unozorodzera shoti yake; wakakotamisa uta hwake, akahukunga.

¹³ Wakadzinasirirawo mapfumo anouraya; unoitira misee yake tsanga dzomuriro.

¹⁴ Ringirai, vanokarakadza ngezvakashata, nokuita mimba yezvakashata, vakabara manyepo.

¹⁵ Vakatsa hunza, vakaivhera mavhu, nokuwira muhunza yevakatsa.

¹⁶ Kuangarara kwavo kunozopetuka pamasoro avo, nokugebenga kwavo kunozodzaka pamasoro avo.

¹⁷ Ndinozobonga Mambo Mwari kudai ngokurururama kwake, ndinozoemba kukudza Mambo Mwari uri padera pezveshe. KuneMutungamiriri woKuemba. Nduyo yaDhavhidha.