Nduyo 69 - Bhaibheri Rakachena muChindau

¹ Ndiponese, A Mwari, ngokuti mvura yaguma pahuro pangu.

² Ndinonzvaira mumachobve akadzama, musikabviri kuema; ndapotera mumvura yakadzama, guwe rinopopoma ngepadera pangu.

³ Ndaremba ngokuchema kwangu; mukuro wangu waomerwa. Madziso angu adzima ngokugarira Mwari wangu.

⁴ Avo vanondizonda ndisina ndaa vawandisa kupinda bvudzi resoro rangu; vazhinji avo vanoda kundiparadza, magaa angu anondiitira ndaa dzokunyepa. Ndinoangiridzwa kupetudza chendisikazi kuba.

⁵ A Mwari, unohuzia upenzi hwangu; zvishaishi zvangu zvendakaita azvizi kufishika kubva kwouri.

⁶ Usatendera kuti avo vanokugonda vatsverudzwe ngendaa yangu, A Mambo Mwari, Mwari wehondo; usatendera kuti avo vanokutsvaka vasakudzwa ngendaa yangu, A Mwari waIsuraeri.

⁷ Indaa yako yakaita kuti nditware kutsverudzwa, kutsverudzwa ukwo kwakafukidza hope yangu.

⁸ Ndaita mupara kunehama dzangu, nowenyika mukanza kunevana vamai angu.

⁹ Kutsamwirira kwemhatso yako kwandipedza; zvituko zveavo vanokutuka zvawira padera pangu.

¹⁰ Apo pendakapfaisa mweya wangu ngokuera kudya, vakandituka ngokuita kudaro.

¹¹ Apo ndakaita saka kuti riite chokusimira changu, ndakaita chishekedzo kwevari.

¹² Ndini wevanoreya avo vanogara pamusiwo wedhorobha, nezvidhakwa zvinoemba ngoma ndini.

¹³ Asi inini, mukumbiro wangu uri kwouri, A Mambo Mwari. Ngenguva inoashirika, A Mwari, muuwandu hwenyasha dzako dzinorudo, ndipingure ngokugondeka kworuponeso rwako.

¹⁴ Ndibudise mumachobve, kuti ndisanzvaira; ngandinunurwe kubva kumagaa angu, nokubva mumvura yakadzama.

¹⁵ Usatendera kuti ndambi igume padera pangu, nokuti kudzama kundimedze; nokuti hunza ikonye muromo wayo padera pangu.

¹⁶ Ndipingure, Mambo Mwari, ngokuti nyasha dzako dzinorudo dzakanaka; kudai ngouwandu hwenyasha dzako dzinokungurira, kunukukira kwendiri.

¹⁷ Usafisha hope yako kubva kunemuranda wako, ngokuti ndiri mukutambudzika; kasira kundipingura.

¹⁸ Kwedzera pasinde pangu, ndiripire. Ndinunure ngendaa yemagaa angu.

¹⁹ Iwewe unozia kutukwa kwendinoashira nokutsverudzwa, nokusikakudzwa; magaa angu eshe anoziikanwa pamberi pako.

²⁰ Zvituko zvasvipisa mwoyo wangu; ndizvo ndirikupera simba. Ndakatsvaka vokundiitira nyasha, asi paiya pasina naumwe. Ndakatsvaka vaembedzeri, asi andizi kuona naumwe.

²¹ Vakandipa chahwahwa kuti chiite kudya kwangu, nokupera kwangu ngenyota vakandimwisa dangapwizhi.

²² Tafura ravo ngariite chirimbana chinovabata, murau wokubata vangani vavo.

²³ Madziso avo ngaapofomadzwe, kuitira kuti vasakona kuona, zviunu zvavo ngazvigare zvechihuta.

²⁴ Durura ushungu hwako padera pavo, ushungu hwako hunobaka ngauvabate.

²⁵ Ugaro hwavo ngahuite matongo; usatendera naumwe kugara mumatende avo.

²⁶ Ngokuti vanotambudza avo vowakachaya, naavo vowakaremadza vachandorwisa kakurutu.

²⁷ Tutsira kushata padera pokushata kwavo; usavatendera kuti vapotere mukururama kwako.

²⁸ Ngavatsukutidzwe kubva mubhuku revanopona; vasanyorwa pakati pevakarurama.

²⁹ Asi inini ndiri murombo nouri mukurwadziwa; ruponeso rwako, A Mwari, ngarundingwarire pakaturama.

³⁰ Ndinozokudza zina raMwari ngenduyo; ndinozomukurisa ngokubonga.

³¹ Izvi zvinozodakadza Mambo Mwari kupinda mudiro wekabi nokuti mukono unenyanga nemadondova.

³² Tenderai vakatsikirirwa vazvione, vadakare; imwimwi munotsvaka Mwari, mwoyo yenyu ngaimusirirwe.

³³ Ngokuti Mambo Mwari unozwa vatami, naye aashoori vake avo vakasungwa.

³⁴ Denga nenyika ngazvimukudze, ruandhle nazvo zveshe zvinohambamwo.

³⁵ Ngokuti Mwari unozoponesa Zioni, nokuakisa maguta aJudha; nevaranda vake vanozogaramwo, vaagare nhaka;

³⁶ Vana vevaranda vake vanozogara nhaka, naavo vanoda zina rake vanozogara mukati mwaro. KuneMutungamiriri woKuemba. Nduyo yaDhavhidha yokupota.