Nduyo 68 - Bhaibheri Rakachena muChindau

¹ Mwari ngaamiruke, magaa ake ngaaparadzwe; avo vanomuzonda ngavatize kubva pamberi pake.

² Kudai ngokudzingwa kwechiushi, ndizvo vadzinge; kudai ngokunyunguruka kwenamo pamberi pomuriro, ndizvo vakashata ngavapere kufa mukuona kwaMwari.

³ Asi vakarurama ngavadakare; ngavakudzwe pamberi paMwari; ngavazare ngokudakara.

⁴ Embai kunaMwari, embai kukudza zina rake; daidzira ngoma kwaari uwo unogadha makore, zina rake ndiMambo Mwari, dakarai imwimwi pamberi pake.

⁵ Baba enherera nomungwariri weshirikadzi, ndiye Mwari muugaro hwake hwakachena.

⁶ Mwari unopa muzi avo vari vega kuti vagaremwo; unoita kuti mabhanditi agarisike, asi vamukiri vanogara munyika yakaoma.

⁷ A Mwari, ngenguva yowakahamba pamberi pevanhu vako, apo wakahamba kupinda ngomushango,

⁸ nyika yakatengenda, matenga akadurura mvura ngokuapo kwaMwari, Mwari weMutunhu weSinai, ngokuapo kwaMwari, Mwari waIsuraeri.

⁹ Iwewe, Mwari, wakanayisa mvura yakawanda, wakanayisa kundau dzeshe; wakagwinyisa nhaka yako apo peyakapera simba.

¹⁰ Mutanga wako wakaona ndau yokugara mweiri; muunaku hwako, A Mwari, wakanasirira varombo zvakanaka.

¹¹ Mambo Mwari unopa izwi; chikurutu chiunga cheavo vanoteketesa mashoko akanaka:

¹² “Madzimambo ehondo anotiza, anotiza!” Vakadzi vari kanyi vanokoanisirana zvakachakatwa,

¹³ kunyazwi vanogara pakati pematanga emapwizhi, kwakadai ngemaphaphiro enjia akafukidzwa ngesirivha, nemanhenga ayo akafukidzwa ngomukore wakasvipirika.

¹⁴ Naapo uwo unesimba reshe paakaparadzirapo madzimambo, chando chakawa padera peZarimoni.

¹⁵ Dunhu rinesimba, Dunhu reBhashani; A mitunhu mizhinji yakaturama, Dunhu reBhashani!

¹⁶ Imwimwi mitunhu yakaturama, munongadzaira ngenyi kumutunhu uwo waanoda Mwari kuti uite ugaro hwake, Mambo Mwari unozogara mukati mwawo mhera nariini?

¹⁷ Ngoro dzaMambo dziri makumi mairi emakumi emazana (20,000), makumi emazana padera pemakumi emazana, Mambo Mwari wakauya kubva Sinai, kupotera mundau yakachena.

¹⁸ Iwewe wakakwira mutunhu wakareba, wechitungamirira vasungwa mumutungwe wako, nokuashira zvipo kubva kuvanhu, kunyazwi kubva kuneavo vanomukira kugarapo kwaMambo Mwari.

¹⁹ Ngaabongwe Mambo Mwari uwo unotitwarira mitwaro yedu zuva ngezuva; Mwari ndiye ruponeso rwedu. Selah.

²⁰ Mwari wedu ndiMwari woruponeso rwedu; kunaMwari, Mambo Mwari, uriyo utiziro kubva kurufu.

²¹ Asi Mwari unozopwanya masoro emagaa ake, dzungudza remamviri reavo vanohamba munjira dzavo dzokushata.

²² Mambo Mwari wakati, “Ndinozovapetudza kubva Bhashani, ndinozovapetudza kubva muudzamu hworuandhle,

²³ kuti ushambe rutsoka rwako mungazi, kuti rurumi rwembwa dzako dziane chikoaniswa kubva kumagaa ako.”

²⁴ Vanoona kupotera kwako, A Mwari, kupotera kwaMwari wangu, Mambo wangu, muugaro hwakachena,

²⁵ vaembi pamberi, varidzi vembira ngesure, pakati pavo vasikana vechiridza makandira.

²⁶ “Kudzai Mwari mumushongano mukuru, Mambo Mwari, imwimwi muri vechinyuka chaIsuraeri!”

²⁷ Uripo Bhenjamini, mudoko wavo, mutungamiriri, vatongi vaJudha nemakota avo, vatongi veZebhuruni, vatongi veNafitari.

²⁸ Daidza simba rako, A Mwari; wonesa kugwinya kwako, kudai ngeizvo zvewakatiitira.

²⁹ Ngendaa yetemperi rako riri muJerusarema, madzimambo anounza zvipo kwouri.

³⁰ Karaidza zvikara zvinogara pakati petsanga, mutanga wemikono, pamwepo nemakonyana evanhu. Tsikatsika pashi petsoka avo vanodisisa mare yomuthero; paradzira vanhu vanodakarira kurwa hondo.

³¹ Thusi ngariunzwe kubva Egipite; vaEthiopia ngavakasire kutambanudza nyara dzavo kunaMwari.

³² Embai kunaMwari, imwimwi umambo hwomunyika; embai kukudza kunaMambo Mwari, Selah.

³³ Iwewe mugadhi wepadera pematenga matenga ekare kare. Purutana, unodaidzira ngeizwi rake, izwi rake rinesimba.

³⁴ Teketesai kuti Mwari unesimba, ukuru hwake huri padera paIsuraeri, nouwo simba rake riri mumatenga.

³⁵ Unotyisa, A Mwari, muugaro hwako hwakachena, Mwari waIsuraeri; unopa simba nokugwinya kuvanhu vake. Ngaakudzwe Mwari! KuneMutungamiriri woKuemba. Nduyo yaDhavhidha.