Nduyo 64 - Bhaibheri Rakachena muChindau

¹ Izwa izwi rangu, A Mwari, mukugunun'una kwangu; ngwarira ndaramo yangu kubva mukutya gaa.

² Ndifishe kubva mubangano rakafishika, revaiti vezvakashata, kubva muurongwa hwevashandi vezvakashata,

³ avo varodzera rurumi rwavo kudai ngeshoti, vakakhokha mazwi avo anovava kudai ngemisee,

⁴ vechifura vanhu vakaperera vari mundau dzakafishika; vanovafura ngokukasira, vasikatongotyi.

⁵ Vanodzishingisa muzano ravo rakashata; vanopangana ngokuteya mirau mwakafishika, vechiti, “Ndiani ungationa?

⁶ Ndiani ungatsvakisisa ndaa dzedu? Tapinimidza kutsvakisisa urongwa hwourimbwi hwokuuraya.” Ngokuti mwoyo womunhu nomupinimidzo zvakadzama.

⁷ Asi Mwari unozoposhera musee wake kwevari; vanozokuwadzwa ngokukasira.

⁸ Ngendaa yorurumi rwavo unozovaparadza; veshe vanovaona vanozodzungudza masoro mukutya.

⁹ Zvino vanhu veshe vanozotya; vechizoteketesa mushando waMwari, vanozopinimidza ndizvo zvaakaita.

¹⁰ Vakarurama ngavadakare munaMambo Mwari, nokuhwara mwaari. Veshe vakarurama mumwoyo ngavakudze. KuneMutungamiriri woKuemba. Nduyo yaDhavhidha. Ngoma.