Nduyo 62 - Bhaibheri Rakachena muChindau

¹ Mweya wangu unogarira Mwari ega mukunyarara; ruponeso rwangu runobva mwaari.

² Aye ega ndiye buwe rangu noruponeso rwangu, ndiye rusvingo rwangu rwakaturama; andizombozungunyiswi.

³ Mukuwo wakaitawani womunozorwisa munhu, kuti mumuuraye, imwimwi mweshe, kudai ngorukumbati rwoda kuwa, kudai ngorushosha rwaungama?

⁴ Urongwa hwavo hwega ngehwokuti varigire pashi munhu kubva kuugaro hwake hwakanaka. Vanodakara ngemanyepo; vanobonga ngomuromo yavo, asi vanotuka ngomumwoyo. Selah.

⁵ Mweya wangu unogarira Mwari ega mukunyarara, ngokuti gonda rangu rinobva kwaari.

⁶ Aye ega ibuwe rangu noruponeso rwangu, rusvingo rwangu; andizombotsukunuswi.

⁷ Pana Mwari ruponeso rwangu nembiri yangu zvinogara; ibuwe rangu rakagwinya, bako rangu riri munaMwari.

⁸ Gondai mwaari nguva dzeshe, imwimwi vanhu; dururai mwoyo yenyu pamberi pake; Mwari ibako redu. Selah.

⁹ Vanhutu vasina shwiro mweya wega, naavo vakuru avana shwiro; mukupimwa vanoreruka; vanoreruka veshe pamwepo kupinda mweya.

¹⁰ Musagonda kuangiridza, musaemesa gonda renyu risina shwiro mukuba; kudai upfumi hwechiwanzwa, musaemesa mwoyo yenyu kwohuri.

¹¹ Kamwe Mwari wakaereketa, kwechipiri ndakazwa ichi: kuti simba ngeraMwari,

¹² nenyasha dzinorudo dziri kwouri, A Mambo Mwari. Ngokuti unounzidzira kumunhu weshe kudai ngemishando yake. Nduyo yaDhavhidha apo aiya mushango raJudha.