Nduyo 60 - Bhaibheri Rakachena muChindau

¹ A Mwari, watirasha, wapwanyira pashi marukumbati edu; waiya wanyangadzwa; tipetudzenyi!

² Waita kuti nyika izungunyike; waitatura; nasirisa ndutwe dzayo, ngokuti inongundangunda.

³ Waita kuti vanhu vako vatambudzike ngezviro zvakakonza; watimwisa vhini ratiita kuti titandadzike.

⁴ Waemesera mujeki avo vanokutya, kuti vavhikirwe kubva kumisee youta. Selah.

⁵ Ipa kunyisa ngenyara yako yomudyo nokutipingura, kuti avo vounoda vapokonyorwe.

⁶ Mwari wakagondisa mukuchena kwake: “Mukudakara ndinozopaura Shekhemu, ndiedzanisire Bani reSukothi.

⁷ Gireadhi ngerangu, Manase ngerangu; Efuremu chiquoko changu; Judha indonga yangu youmambo.

⁸ Moabhi chidziyo changu chokushambiramwo; padera peEdhomu ndinozokandirapo gwada rangu; padera peFiristia ndinodaidzira mukunyisa.”

⁹ Ndiani unozondiunza mudhorobha rakashosherwa? Ndiani unozonditungamirira kuenda Edhomu?

¹⁰ Auzi kutiramba isusu here, A Mwari? Aubudi nehondo dzedu, A Mwari.

¹¹ A, tidetsere kurwa negaa, ngokuti kudetsera kwevanhu akuna shwiro.

¹² NaMwari tinozoita ngoungwazi; ndiye unozotsikirira pashi magaa edu. KuneMutungamiriri woKuemba nezvoKuridza. Nduyo yaDhavhidha.