Nduyo 6 - Bhaibheri Rakachena muChindau

¹ Mambo Mwari, usandikaraidza muushungu hwako, nokuti kundiorora mukunyangadzwa kwako.

² Ndiitire nyasha, A, Mambo Mwari; ngokuti ndapererwa; A Mambo Mwari, ndiponese, ngokuti magodo angu anohuta ngokutya.

³ Mweya wangu unobatwazve ngokutya, apo iwewe, A Mambo Mwari, unozononoka metsa riini?

⁴ Petuka, A Mambo Mwari, ununure mweya wangu; ndiponese ngendaa yenyasha dzako dzinorudo.

⁵ Ngokuti murufu amuchina unomukarakadza; muSheori ndiani ungakona kumukudza?

⁶ Ndaremba ngokugwimba kwangu; ndinonyakatisa mubhedhi wangu ngemasodzi usiku hweshe; ndinochururisa mubhedhi wangu ngemasodzi angu.

⁷ Madziso angu anotsakara ngokutambudzika; anopera simba ngendaa yemagaa angu eshe.

⁸ Ibvai kwendiri, imwimwi mweshe vashandi vezvakashata, ngokuti Mambo Mwari wazwa izwi rokuchema kwangu.

⁹ Mambo Mwari wazwa kupota kwangu; Mambo Mwari unoashira mukumbiro wangu.

¹⁰ Magaa angu eshe anozotsverudzwa nokubatwa ngokutya; anozohwirira sure nokutsverudzwa ngokukasira. Nduyo yaDhavhidha iyo yaakaemba kunaMambo Mwari ngendaa yaKhushi muBhenjamini.