Nduyo 59 - Bhaibheri Rakachena muChindau

¹ Ndinunure kubva kumagaa angu, A Mwari wangu; ndingwarirenyi kubva kuneavo vanondimukira.

² Ndinunure kubva kuneavo vanoshanda zvakashata; undiponese kubva kuvanhu vanenyota yengazi.

³ Kunyazwi zvino, vanohwarira ndaramo yangu; vanesimba vanomusa mweya wokurwa neni, pasina ndaa yokupauka kwangu, nokuti yokushaisha kwangu, A Mambo Mwari.

⁴ Pasina ndaa yangu vanorumba vechidzinasirira. Muka iwewe pachako, uya kundidetsera, uringire.

⁵ Iwewe, Mambo Mwari, Mwari wehondo, Mwari waIsuraeri. Miruka, uorore madzinza eshe; usaponesa naumwe wavo vanopauka kuita zvakashata. Selah.

⁶ Vanouya madeekoni eshe vechiukura kudai ngembwa, vechitenderera dhorobha.

⁷ Apo, vanofemurika ngemiromo yavo, nemazwi akapinza kudai ngeshoti pamiromo yavo, ngokuti vanoti, “Ndiani unozotizwa?”

⁸ Asi iwewe, Mambo Mwari, unozovasheka; unozoasvereredza madzinza eshe.

⁹ A simba rangu, ndinozokugarira; ngokuti iwewe, Mwari ndiwe rusvingo rwangu.

¹⁰ Mwari wangu munyasha dzake dzinorudo unozoshongana neni; Mwari wangu unozondiita kuti ndione kunyiswa kwemagaa angu.

¹¹ Usavauraya, ngokuti vanhu vangu vangariyarwa; vaparadze ngesimba rako, uvadzase pashi, A Mambo Mwari, chihlangu chedu.

¹² Ngendaa yechishaishi chemiromo yavo, mazwi emiromo yavo, ngavabatwe mukudzikudza kwavo. Ngendaa yokutuka nemanyepo zvevanoereketa,

¹³ vapedze muushungu; vapedze kuti vasachazoapo. Zvino zvinozoziikanwa metsa kumagumo enyika kuti Mwari unotonga padera paJakobe. Selah.

¹⁴ Mumadeekoni eshe vanopetuka, vechiukura kudai ngembwa, vechitenderera dhorobha.

¹⁵ Vanopepesheka peshe vechitsvaka kudya, navo vanobhonga kuti vasaguta.

¹⁶ Asi inini ndinozoemba ngendaa yesimba rako; ndinozoemba kudaidzisa ngendaa yenyasha dzako dzinorudo mumagwanani. Ngokuti iwewe waiya rusvingo rwangu nebako rokuhwara ngezuva rokutambudzika kwangu.

¹⁷ A simba rangu, ndinozoemba kukukudza, ngokuti iwewe, A Mwari, uri rusvingo rwangu, Mwari unondionisa nyasha dzinorudo. KuneMutungamiriri woKuemba. Nduyo yaDhavhidha apo akarwa naAramu Naharaimu naAramu Zobha naapo Joabhi apetuka nokuuraya makumi emazana gumi nemairi evaEdhomu muBani reMunyu.