Nduyo 58 - Bhaibheri Rakachena muChindau

¹ Ngegwinyiso munogura zvakarurama here, imwimwi zvimwari? Munotonga vanhu ngenjira yakarurama here?

² Haiwa, munoronga zvakashata mumwoyo yenyu; nyara dzenyu dzinoshanda kugebenga munyika.

³ Vakashata vanopauka kubva vachiri mundani; vanopauka vachaamba kubarwa, vechiereketa manyepo.

⁴ Vaneukaira hwakadai ngoukaira hwenyoka; vakadai ngebuura risikazwi rinotsiira nzee dzaro,

⁵ ndizvo aripurutani izwi revaringidzi, nokuti avo vasikabviri ngourimbwi hwokuringidza.

⁶ A Mwari, gurai mazino ari mukanwa mwavo; gura mbangura dzemazino evana vemhondoro, A Mambo Mwari!

⁷ Ngavapwe kudai ngemvura inopopoma; kudai ngemwenje ngavatsikwetsikwe pashi vaome.

⁸ Ngavadai ngehozhwe inohamba yechipororozeka; kudai ngewapfupfudzika usikazi kuona kujeka kwezuva.

⁹ Ngokukasirisa kupinda hari dzenyu dzisati dzazwa kupisha kwemuriro weminzwa, kunyazwi kusvipirika nokuti kutsva, ngaatsvaire zveshe kuretu!

¹⁰ Vakarurama vanozodakara apo vaona kuunzidzirwa kwechiitwa; vanozoshamba tsoka dzavo mungazi yevakashata.

¹¹ Vanhu vanozoti, “Ngegwinyiso uriyo musharo wevakarurama. Ngegwinyiso uriyo Mwari unotonga panyika.” KuneMutungamiriri woKuemba. Nduyo yaDhavhidha apo Sauri atumira vanhu koorinda mhatso yaDhavhidha kuti amuuraye.