Nduyo 57 - Bhaibheri Rakachena muChindau

¹ Ndiitire nyasha, A Mwari, ndiitire nyasha, ngokuti mweya wangu unohwara mwouri; mubvuri remaphaphiro ako ndinozohwara, metsa dutu rinoparadza rapinda.

² Ndinozochemera kunaMwari Uri-padera-pezveshe, kunaMwari unozadzisa zviro zveshe zvaanoda kwendiri.

³ Unozotumira kubva mudenga, andiponese; unozotsverudza avo vanotsikatsika padera pangu; Selah. Mwari unozotumira nyasha dzake dzinorudo nokugondeka kwake.

⁴ Ndinoata pashi pakati pemhondoro dzinoboka kudya nyama yomunhu; mazino avo mikhondo nemisee, rurumi rwavo ishoti dzinopinza.

⁵ Kudzwai, A Mwari, padera pematenga. Uthende hwako ngahuwepo padera penyika yeshe.

⁶ Vakateya tsoka dzangu ngemambure kundibata; mweya wangu unokotamiswa pashi. Vakatsa hunza munjira yangu, asi vawira mukati mwayo pachavo. Selah.

⁷ Mwoyo wangu wakatsima, A Mwari, mwoyo wangu wakatsima. Ndinozoemba, ndinozoemba zvakanaka kukukudza.

⁸ Muka, mweya wangu! Muka, A chidangari nembira! Inini ndinozomusa mambakwedza.

⁹ Ndinozokubonga, A Mambo Mwari, pakati pembeu dzevanhu; ndinozoemba kukukudza pakati pemadzinza.

¹⁰ Ngokuti nyasha dzako dzinorudo ihuru, dzinoguma mumatenga, nokugondeka kwako kunoguma mumakore.

¹¹ Kudzwai, A Mwari, padera pematenga. Uthende hwako ngahuwepo padera penyika yeshe. KuneMutungamiriri woKuemba. Nduyo yaDhavhidha.