Nduyo 56 - Bhaibheri Rakachena muChindau

¹ Ndiitire nyasha, A Mwari, ngokuti vanhu vanotsikatsika padera pangu; mutakatiro wezuva reshe magaa anonditambudza;

² magaa angu anonditsikatsika zuva reshe, ngokuti vazhinji vanorwa neni. A, Uripadera Pezveshe,

³ apo pendinotya, ndinogonda mwouri.

⁴ MunaMwari, uwo wendinokudza izwi rake, munaMwari ndinogonda; andityi; nyama ingaitenyi kwendiri?

⁵ Zuva reshe vanotsvaka kundiremadza; mikarakadzo yavo yeshe ngeyokundiitira zvakashata.

⁶ Vanomirudza mweya wokurwa, vanondihwarira, vanoringisisa tsoka dzangu, vechikarira kundiuraya.

⁷ Ndizvo vaunzidzirenyi mukushata kwavo; muushungu kandirai pashi vanhu, A Mwari!

⁸ Iwewe waramba wechierenga kupepesheka kwangu; isa misodzi yangu mubhodhleya. Aisirimwopi mubhuku rako here?

⁹ Zvino magaa angu anozohwirira sure ngezuva rendinozodaidza ndiro. Ndinozia izvi, ngokuti Mwari ngowangu.

¹⁰ MunaMwari, uwo wendinokudza izwi rake, munaMambo Mwari, uwo wendinokudza izwi rake,

¹¹ muna Mwari ndinogonda; andityi. Munhu ungaitenyi kwendiri?

¹² Mhiko dzangu kweuri ndinosisira kuita, A Mwari; ndinozopira midiro yokubonga kwouri.

¹³ Ngokuti iwewe wakanunura mweya wangu kubva murufu, netsoka dzangu kubva mukuwa, kuti ndihambe pamberi paMwari mukujeka kwokupona. KuneMutungamiriri woKuemba. Nduyo yaDhavhidha, apo atiza Sauri mubako.