Nduyo 55 - Bhaibheri Rakachena muChindau

¹ Izwa mukumbiro wangu, A Mwari; usadzifisha kubva mukupota kwangu.

² Purutana kwendiri, undipingure; ndinotambudzwa mukugunun'una kwangu. Ndinokangaidzwa

³ ngebope regaa, ngendaa yokutambudzwa ngevakashata. Ngokuti vanoposhera kushata padera pangu, muushungu vanodakara ngeugaa neni.

⁴ Mwoyo wangu unorwadziwa kakurutu mukati mwangu, nemaharura orufu awira padera pangu.

⁵ Kutya nokuhuta zvauya padera pangu, nokutyisa kukurutu kwandimbonya.

⁶ Neni ndinoti, “A, kudai ndaiya nemaphaphiro kudai ngenjia! Ndaizombururuka, kuti ndoozorora.

⁷ Ngegwinyiso ndaizomburukira kuretu; ndaizoita ugaro hwangu mushango. Selah.

⁸ Ndaizokasira kutsvakira dumba rokuhwara kubva kudutu romubvumo mukuru.”

⁹ Kangaidza, A Mambo Mwari, musiyanise ndimi dzavo; ngokuti ndinoona kugebenga nehasha mudhorobha.

¹⁰ Masikati nousiku vanotenderera padera pemarukumbati aro, kushata nokuangarara zviri mukati mwaro.

¹¹ Kuparadzwa kuri mukati mwaro; kutambudza nokuchengedzera azvibvi mumusika waro.

¹² Andiropi gaa rakanditsverudza; ndaizodai ndakatsunga; andinyepi waindizonda wakadzikudza padera pangu; ndaizodai ndakadzifisha kubva kwaari.

¹³ Asi ndiwe munhu uri ndanga yangu, mungani wangu, neshamwari yangu yepamwoyo,

¹⁴ naye takaita bangano rakanaka; takahamba kupotera mumhatso yaMwari pamwepo nembungano.

¹⁵ Rufu ngaruuye padera pavo; ngavanzvaire muSheori vechizwa; ngokuti kushata kuri muugaro hwavo nomumwoyo mwavo.

¹⁶ Asi inini ndinodaidza Mwari, naMambo Mwari unozondiponesa.

¹⁷ Madeekoni nemangwanani nemasikati ndinozogunun'una, ndechitsumba, naye unozozwa izwi rangu.

¹⁸ Unozondinunura ndisina kuremadzwa kubva muhondo yendinorwa, ngokuti vazhinji vanorwa neni.

¹⁹ Mwari uwo wakagara padendamero kubvira karetu, unozozwa, avapfaise, ngokuti avapinduki, avamutyi Mwari.

²⁰ Mungani wangu wakatambanudza nyara dzake padera peshamwari; wakagura chitenderano chake,

²¹ ngokuereketa kwakapfaa kupinda mafuta omukaka, asi anemwoyo wakazara ngokurwa hondo; nemazwi akapfaa kupinda mafuta, asi akadai ngeshoti dzakashwamurwa.

²² Poshera mutwaro wako padera paMambo Mwari, naye unozokutsimisa; aazotendi kuti vakarurama vazungunyiswe.

²³ Asi iwewe, Mwari, unozovarigira pashi muhunza; vanhu vanenyota yengazi nevanochengedzera avazorarami rupande rwemazuva okupona kwavo. Asi inini ndinozogonda mwouri. KuneMutungamiriri woKuemba. Nduyo yaDhavhidha, apo vaFiristia vamubata muGathi.