Nduyo 51 - Bhaibheri Rakachena muChindau

¹ Ndiitire nyasha, A Mambo Mwari, kudai ngenyasha dzako dzinorudo; kudai ngouwandu hwenyasha dzako dzinokungurira tsukutidza zvishaishi zvangu.

² Ndisukenyi kakurutu kubva mukushata kwangu, nokundichenesa kubva muchishaishi changu.

³ Ngokuti ndinozia zvishaishi zvangu, nechishaishi changu chinogara chiri pamberi pangu.

⁴ Kwouri, iwewe wega, ndakashaisha, nokuita chakashata mukuona kwako, kuti upembedzwe mukutonga nokuita usina ndaa apo pomunogura ndaa.

⁵ Ngegwinyiso ndakabarwa mukushata, mushaishi apo mai angu vakatonha mimba yangu.

⁶ Ringira, unodisisa gwinyiso ngomukati; ndizvo ndidzidzise ungwaru mumwoyo wangu mwakafishika.

⁷ Ndisuke ngehisopi, neni ndinozochena; ndisuke, neni ndinozochena kupinda chando.

⁸ Ndiite kuti ndizwe kudakara nokudakadzwa; magodo owakapwanya adakare.

⁹ Fisha hope yako kubva kuzvishaishi zvangu, utsukutidze kweshe kushata kwangu.

¹⁰ Sika mwoyo wakachena mukati mwangu, A Mwari, nokuisa mweya mutsva wakarurama mukati mwangu.

¹¹ Usandirasha kubva mukuapo kwako, usadusa mweya wako wakachena kubva mwendiri.

¹² Hwirinza mwendiri kudakadza kworuponeso rwako, unditsimise ngomweya wako unotenda.

¹³ Zvino ndinozodzidzisa vapauki ngenjira dzako, nevashaishi vanozotenderukira kwouri.

¹⁴ Ndinunure kubva mundaa yengazi, A Mwari, iwewe Mwari woruponeso rwangu, norurumi rwangu runozonasa kuemba ngokununura kwako.

¹⁵ A Mambo Mwari, beura miromo yangu, nomuromo wangu unozodaidzira kukudzwa kwako.

¹⁶ Ngokuti iwewe audakariri mibairo; kudai ndaizokupa mudiro wokupisha, usaizodakara ndiwo.

¹⁷ Mubairo unoashirika kunaMwari mweya wokutambudzika; mwoyo unotambudzika nowakapfaa, A Mwari, auzoushoori.

¹⁸ Ita zvakanaka kuZioni mukudakara kwako kwakanaka; akisa marukumbati eJerusarema.

¹⁹ Zvino unozodakarira mibairo yokururama, mumidiro inopishwa nemidiro inopishwa yeshe; zvino mikono inozopirwa padera pearita rako. KuneMutungamiriri woKuemba. Nduyo yaDhavhidha, apo Dhoegi muEdhomu aenda kunaSauri nokumuronzera, “Dhavhidha waenda kumhatso yaAhimerekhi.”