Nduyo 5 - Bhaibheri Rakachena muChindau

¹ Izwa mazwi angu, A Mambo Mwari; purutana kugwimba kwangu.

² Purutana izwi rokuchema kwangu, Mambo wangu naMwari wangu, ngokuti ndinokumbira kwouri.

³ Mambo Mwari, unozwa izwi rangu mumangwanani; mumangwanani ndinounza mukumbiro wangu kwouri, nokurinda.

⁴ Ngokuti iwewe ausiri Mwari unodakara ngezvakashata; kushata akuzogari newe.

⁵ Vanodzikudza avazoemi pamberi pemadziso ako; unozonda veshe vanoita zvakashata.

⁶ Unoparadza avo vanoereketa manyepo. Mambo Mwari unonyangadzwa ngounenyota yokuparadza ngazi, nounochengedza.

⁷ Asi inini ndinozopotera mumhatso mwako ngouwandu hwenyasha dzako dzinorudo. Ndinozogwadama ndakaringira kutemperi rako rakachena mukukutya.

⁸ Nditungamirire, Mambo Mwari, mukurururama kwako ngendaa yemagaa angu; njira yako ngairurame pamberi pehope yangu.

⁹ Ngokuti amuna gwinyiso mumiromo yavo; mwoyo yavo inoparadza; huro dzavo makuva akabeuka; vanoradzikidza ngorurumi rwavo.

¹⁰ Ita kuti vatware ndaa dzavo, A Mwari; ngavawe ngebangano ravo; vasukumidzire kubanze ngendaa youwandu hwokupauka kwavo, ngokuti vakakumukira.

¹¹ Asi ngavadakare veshe vanogonda mweuri; ngavagare vechiemba ngokudakara. Tambanudza kungwarira kwako padera pavo, kuti avo vanoda zina rako vadakare mweuri.

¹² Ngokuti iwewe unozofumisa vakarurama, Mambo Mwari; unozovafukidza ngenyasha kudai ngechihlangu. KuneMutungamiriri woKuemba, neZvidangari. Nduyo yeMazembera yaDhavhidha.