Nduyo 49 - Bhaibheri Rakachena muChindau

¹ Izwai ichi, imwimwi mweshe mbeu dzevanhu; purutanai, imwimwi mweshe vagari venyika,

² veshe vadoko nevakuru, vapfumi nevarombo pamwepo.

³ Muromo wangu unozoereketa ungwaru; nokupinimidza kwomwoyo wangu kunozozwisisa.

⁴ Ndinozoungamisa nzee yangu kuzwa madimikira; ndinozodudzira chinai changu ngokuemba ngechimadangare.

⁵ Ndinozotya ngenyi ngemazuva okutambudzika, apo kushata kwevatambudzi vangu kwechinditendenedza,

⁶ avo vanogonda pfuma yavo, vechiganza ngouwandu hwepfuma yavo?

⁷ Ngegwinyiso akuna naumwe wavo ungaripira hama yake kunyazwi ngeiri njira, nokuti kupa kunaMwari muripo.

⁸ Ngokuti muripo womweya wavo unoita mutengo wakakurisa akuna ungaukona,

⁹ kuti agare echipona mhera nariini, kuti asazoona iba.

¹⁰ Naapo petinoringira tinoona vanhu vakangwara vanofa; benzi nebungumupee vanopera veshe, vechisiya upfumi hwavo kunevamweni.

¹¹ Maiba avo ndiwo makanyi avo mhera nariini, ugaro hwavo hunozoa kumibarirwana yeshe; kunyazwi vakadudza nyika ngemazina avo.

¹² Asi munhu unembiri aazogari; unodai ngemhuka dzinopera.

¹³ Aya ndiwo magumo emapenzi, magumo aavo vanodakara ngezvevanazvo. Selah.

¹⁴ Vakaemeserwa kudai ngemakwai anoenda muSheori; rufu runozoita muushi wavo; vanozorurama kudzaka muiba, nounaku hwavo hunozopedzwa; Sheori ndimwo munozoita ugaro hwavo.

¹⁵ Asi Mwari unozoripira mweya wangu kubva musimba reSheori, ngokuti unozondiashira. Selah.

¹⁶ Usatya apo umweni apfuma, apo upfumi hwemhatso yake hwawandiswa.

¹⁷ Ngokuti apo paanofa, apana chiro chaanotwara kuenda nacho; upfumi hwake ahuzodzaki naye kumuteera.

¹⁸ Kunyazwi achararama, akanyadakadzisa mweya wake, (nevanhu vanokukudza ngenguva younodziitire zvakanaka,)

¹⁹ unozoenda kuzero remadzibaba ake; avachazooni kujeka mhera nariini.

²⁰ Munhu aakoni kugara mumbiri yake, unotodzana nemhuka dzinopera. Nduyo yaAsafi.