Nduyo 48 - Bhaibheri Rakachena muChindau

¹ Mambo Mwari mukuru, unosisira kukudzwa kakurutu, mudhorobha raMwari wedu. Mutunhu wake wakachena,

² wakanaka kutunhumara kwaro, kudakara kwenyika yeshe, Mutunhu Zioni kurupande rwedera, dhorobha ramambo mukuru rinounza kudakara kunyika yeshe.

³ Mwari wakadzionisa pachake mungome dzake kuti uri bako rokuhwara.

⁴ Zvino madzimambo akashongana pachawo, akapinda pamwepo.

⁵ Apo variona, vakashamiswa; vakakaruka, vakakasira kutiza;

⁶ kuhuta kwakavagumirapo, nokurwadziwa kudai ngomukadzi wopotwa ngokubereka,

⁷ kudai ngedutu rokumabvazuva rinopwanya ngarava dzeTarshishi.

⁸ Kudai ngezvetazwa, ndizvo taona mudhorobha raMambo Mwari wehondo, mudhorobha raMwari wedu, Mwari unoritsimisa mhera nariini. Selah.

⁹ Tinokarakadza ngenyasha dzako dzinorudo, Mwari, tiri mukati mwetemperi rako.

¹⁰ Zina rako, A Mwari, rakadaro nokukudzwa kwako, rinoguma kumagumo enyika. Nyara yako yokumudyo yakazara ngokunyisa.

¹¹ Mutunhu Zioni ngaudakare, vanasikana vaJudha ngavadakare ngendaa yokutonga kwako.

¹² Hambai kutenderera Zioni, muritenderere reshe, muerenge mathawa aro,

¹³ nasai kuringisisa marukumbati; pindai ngomungome dzaro, kuti muzvironzere kumibarirwana inouya

¹⁴ kuti uyu ndiMwari, Mwari wedu, wemhera nariini nariini. Unozoita mutungamiri wedu metsa mukufa. KuneMutungamiriri woKuemba. Nduyo yeVakororo vaKhora.