Nduyo 45 - Bhaibheri Rakachena muChindau

¹ Mwoyo wangu unomwaraka ngendaa yakanaka; ndinoereketa zviro zvendakaitira mambo; rurumi rwangu chinyoreso munyara yomunyori unokona.

² Iwewe wakanaka kupinda vamuna veshe; nyasha dzadururwa pamiromo yako; ndizvo Mwari wakakufumisa mhera nariini.

³ Sungira shoti yako pachiunu chako, iwewe tsvisi, muuthende hwako noumambo hwako.

⁴ Muumambo hwako gadha kudai ngomunyisi, ngendaa yegwinyiso nokupfaa nokururama; nyara yako yokumudyo ngaikudzidzise zviro zvinotyisa.

⁵ Misee yako yakapinza mumwoyo yemagaa amambo, vanhu vanowa pashi pako.

⁶ Dendemaro rako roumambo, A Mwari, ngeremhera nariini nariini. Ndonga youmambo hwako indonga yokururama;

⁷ iwewe unoda kururama, unozonda zvakashata. Ndizvo Mwari, Mwari wako, wakudzodza ngemafuta okudakara kunopinda shamwari dzako;

⁸ zveshe zvokufuka zvako zvinonuhwira mure, aroesi nekhasia. Kubva mungome dzenyanga dzenzou zvokuridza zvinetambo zvinokudakadza.

⁹ Vanasikana vemadzimambo vari pakati pevakadzi vako vanoremeredzwa; panyara yako yokumudyo kunoema vahosi vakapfeka zvomukore weOfiri.

¹⁰ Purutana, mwanasikana, upinimidze, ukotamise nzee yako; riyarwa vanhu vako nemhatso yababa ako,

¹¹ namambo unozodisisa unaku hwako. Ngokuti ndiye mambo wako, mudirenyi.

¹² Mwanasikana weThire unozotsvaka nyasha dzako anezvipo, makurudza evanhu anopinda veshe vanembeu dzeshe dzoupfumi.

¹³ Mwanasikana wamambo unoitwa uthende mungome yake nezvokufuka zvake zvakarukwa zvomukore;

¹⁴ muzvokupfeka zvinemaara akawanda, unotungamirirwa kuenda kunamambo; sure kwake mhandwe, shamwari dzake, dzinomuteera.

¹⁵ Ngokudakadzwa nokudakarisa vanotungamirirwa apo pevanopotera mungome yamambo.

¹⁶ Paugaro hwemadzibaba vakororo venyu vanozogarapo; unozovaita vazvare munyika mweshe.

¹⁷ Ndinozoita kuti zina rako rikudzwe mumazero eshe; ndizvo mbeu dzevanhu dzinozokukudza mhera nariini nariini. KuneMutungamiriri woKuemba. Nduyo yeVakororo vaKhora.