Nduyo 44 - Bhaibheri Rakachena muChindau

¹ Takazwa ngenzee dzedu, A Mwari, madzibaba edu akatironzera, mishando yewakaita ngamazuva okurarama kwavo, ngemazuva ekaretu:

² iwewe ngenyara yako wakadzinga madzinza, asi avo wakavasima; wakatambudza mbeu dzevanhu, wakavaparadza, asi avo wakavasunhura;

³ ngokuti avazi kutora nyika ngeshoti yavo, nemioko yavo aizi kuvapa kunyisa; asi nyara yako yokumudyo, nomuoko wako, nokujeka kwehope yako, ngokuti wakadakara ndivo.

⁴ Iwewe uri Mambo wangu naMwari wangu; iwewe unopanga kunyisa kwaJakobe.

⁵ Kubudikidza ndiwe tinorigira pashi magaa edu; ngezina rako tinozotsikirira pashi avo vanotimukira.

⁶ Ngokuti andizogondi uta hwangu, neshoti yangu aizokoni kundiponesa.

⁷ Asi iwewe watiponesa kubva kumagaa edu, waisa mukukangaidzwa avo vanotizonda.

⁸ MunaMwari taganza mutakatiro wezuva reshe, tinozobonga zina rako mhera nariini. Selah.

⁹ Asi zvino watirasha, ukatitsverudzisa, usikahambi nehondo dzedu.

¹⁰ Watiita kuti titize kubva kumagaa edu, nemagaa edu anopamba zviro zvedu.

¹¹ Watiita kudai ngemakwai akatsanangurirwa kuurawa; watiparadzira pakati pemadzinza.

¹² Watengesa vanhu vako pasina mutengo, auzi kudzitemera mutengo wazvo wakakwira.

¹³ Watiita chishekedzo chevaakirwana vedu. Tinoshoorwa nokushekwa ngaavo vakatitendenedza.

¹⁴ Watiita chinai pakati pemadzinza, nokudzungudzirwa masoro pakati pemadzinza.

¹⁵ Kutsverudzwa kwangu kuri pamberi pangu zuva reshe, nezvidzu zvafukidza hope yangu

¹⁶ pamazwi omuiti wejee nomutuki, nepakuona kwegaa nomuunzidziri.

¹⁷ Izvi zveshe zvakauya padera pedu, asi atisati takuriyarwa, nokuti kugura chitenderano chako.

¹⁸ Mwoyo yedu aizikuhwirira sure, nokuti tsoka dzedu adzizi kupauka kubva munjira yako;

¹⁹ asi wakatidzengenesa kakurutu mundau yehava, wakatifukidza ngebvuri rokufa.

²⁰ Kudai takariyarwa zina raMwari wedu, nokuti kutambanudzira nyara dzedu kunezvimwari zvipara,

²¹ Mwari aazozvioni izvi here? Ngokuti unozia zvakafishika zvomwoyo.

²² Ngendaa yako tinourawa mutakatiro wezuva weshe, tinoerengwa kudai ngemakwai akaemeserwa kuurawa.

²³ Dzimusei! Unoatirenyi, Mambo Mwari? Miruka, usatirasha mhera nariini!

²⁴ Ngenyi wechifisha hope yako? Ngenyi wechiriyarwa kurwadziwa nokutambudzwa kwedu?

²⁵ Ngokuti mweya wedu unonzvaira mubukuta; miiri yedu inonamira pamavhu.

²⁶ Miruka, uya utidetsere. Utisunhure ngendaa yenyasha dzako dzinorudo. KuneMutungamiriri woKuemba. Ngoma yoMuchadho yeVakororo vaKhora.