Nduyo 41 - Bhaibheri Rakachena muChindau

¹ Unomuchena munhuwo unokarakadza varombo; Mambo Mwari unozomununura ngezuva rezvakashata.

² Mambo Mwari unomungwarira nokumuponesa; unodaidzwa kuti unomuchena munyika. Usamupira mukuda kwemagaa ake.

³ Mambo Mwari unozomutsimisa pamubhedhi wokurwarira; muurwere hwake hweshe unozomuponesa.

⁴ Ndakati inini, “Mambo Mwari, ndiitire nyasha; rapa mweya wangu, ngokuti ndakashaisha kwouri.”

⁵ Magaa angu anoereketa zvakashata ndini echiti, “Unozofa riini, nezina rake rinozopera riini?”

⁶ Naapo vechiuya kuzondiona, vanoereketa manyepo; mwoyo yavo inodziunganidzira kushata; apo vanobuda kubanze, vanozoereketa ndizvo kweshe.

⁷ Veshe vanondizonda vanoita vherevhere pamwepo ngendaa yangu; vanopangana kundiitira zvakanyanya kushata.

⁸ Vanopinimidza kuti chiro chinouraya chakandinamira, kuti ndikaata pashi, andichamukizve.

⁹ Kunyazwi hama yangu yepamwoyo yendaigonda mweiri, uwo wakadya chingwa changu, wandimirudzira chisisino chake kurwisana neni.

¹⁰ Asi iwewe, Mambo Mwari, ndiitire nyasha, undimirudze, kuti ndivaunzidzire.

¹¹ Ngeizvi ndinozia kuti iwewe unodakara ndini, ngokuti gaa rangu arizi kundinyisa.

¹² Asi iwewe, unonditsimisa ngendaa yokururama kwangu, nokundiemesa pamberi pehope yako mhera nariini.

¹³ Ngaakudzwe Mambo Mwari, Mwari waIsuraeri, kubvira riini nariini. Ameni naAmeni.