Nduyo 40 - Bhaibheri Rakachena muChindau

Nduyo yoKukudza

KuneMutungamiriri woKuemba. Nduyo yaDhavhidha.

¹ Ndakagarira Mambo Mwari ngokutsengerera; wakakotamira kwendiri nokuzwa kuchema kwangu.

² Wakandibvisa muhunza inotyisa, nomuchiteetee; wakaemesa tsoka dzangu paruware, akagwinyisa kuhamba kwangu.

³ Wakaisa nduyo itsva pamuromo wangu, nduyo yokukudza kunaMwari wedu. Vazhinji vanozozviona, vatye, nokuisa gonda ravo munaMambo Mwari.

⁴ Unomuchena munhuwo unoita kuti Mwari aite gonda rake, usikakunukukiri kunevanodzikudza, avo vanopaukira kuzvimwari zvemanyepo.

⁵ A Mambo Mwari, Mwari wangu, mishando yako yowakaita mizhinji inoshamisa, nemirangariro yako kwetiri; akuna ungaedzaniswa newe. Kudai ndaizvironza nokuereketa ndizvo, zvakawanda, azvierengeki.

⁶ Mubairo nomudiro audakari ndizvo; asi wabeura nzee dzangu. Mudiro wokupisha nomudiro wokushaisha auzi kuzvibvunza.

⁷ Zvino ndakati, “Ringira, ndiripano; mubhuku rakapetwa mwakanyorwa ngendaa yangu.

⁸ Ndinodakara kuita kuda kwako, Mwari wangu; mupango wako uri mumwoyo mwangu.”

⁹ Ndateketesa mashoko akanaka okuponeswa mumushongano mukuru; wona, andizi kupinga miromo yangu, Mambo Mwari, unozvizia.

¹⁰ Andizi kufisha kururama kwako kunoponesa mumwoyo mwangu, ndakateketesa ugondeki hwako noruponeso rwako; andizi kufisha nyasha dzako dzinorudo nokugondeka kwako mumushongano mukuru.

¹¹ Usanditsiirira nyasha dzako dzinorudo kubva kwendiri, Mambo Mwari; tendera nyasha dzako dzinorudo nokugondeka kwako kuti zvindingwarire mhera nariini.

Mukumbiro woKudetserwa

¹² Ngokuti zvakashata zvisikaerengeki zvakanditendenedza; zvishaishi zvangu zvandibata, metsa andichakoni kuringira mudenga; zvawanda kupinda bvudzi resoro rangu, nomwoyo wangu unopera simba.

¹³ Dakarai, Mambo Mwari, kundinunura; kasira kundidetsera, A Mambo Mwari.

¹⁴ Ngavatsverudzwe nokukangaidzwa veshe pamwepo, avo vanotsvaka kuuraya mweya wangu; ngavapetudzwe sure, vatsverudzwe, avo vanodakarira kuremadzwa kwangu.

¹⁵ Ngavakarudzwe ngendaa yokutsveruka kwavo, avo vanoti kwendiri, “Aha Aha!”

¹⁶ Asi veshe vanokutsvaka ngavadakare, vadakadzwe mwouri; veshe vanoda ruponeso rwako, ngavagare vechiti, “Mambo Mwari mukurutu!”

¹⁷ Asi inini ndiri murombo nomutami; asi Mambo Mwari unopinimidza ndini. Iwewe uri mudetseri wangu nomununuri wangu; usanonoka, A Mwari wangu. KuneMutungamiriri woKuemba. Nduyo yaDhavhidha.