Nduyo 39 - Bhaibheri Rakachena muChindau

¹ Ndakati, “Ndinozongwarira njira dzangu kuti ndisashaisha ngorurumi rwangu; ndinozongwarira muromo wangu ngemukhayo, apo wakashata ari pamberi pangu.”

² Ndaiya chimbungumbungu ndisikaereketi; ndakanyarara, azvizi kundidetsera; kurwadziwa kwangu kwakanyanya,

³ mwoyo wangu wakapisha ngomukati mwangu; naapo ndechipinimidza, muriro wakabaka. Zvino ndakaereketa ngorurumi rwangu:

⁴ “Mambo Mwari, ndiitei kuti ndizie magumo angu, nouwandu hwemazuva angu; ndiitenyi kuti ndizie kukasira kuguma kwokupona kwangu.

⁵ Ringira, wakaita kuti mazuva angu atsonge kudai ngoupamhu hwenyara, nenguva yokupona kwangu iri chiro chisina shwiro pamberi pako. Ngegwinyiso munhu weshe muchiemo chake chakanaka uri usina shwiro. Selah.

⁶ Ngegwinyiso munhu weshe unohamba kudai ngebvuri. Ngegwinyiso vanotsinzwa ngepasina chiro; unounganidza upfumi, asikazii kuti ndiani unozohutora.

⁷ Nazvino, Mambo Mwari, ndichagarirenyi? Gonda rangu riri mwouri.

⁸ Ndinunure kubva mukupauka kwangu kweshe; usandiita kuti ndiite chitsverudzo chemapenzi.

⁹ Ndiri chimbungumbungu, andizi kushama muromo wangu; ngokuti ndiwe wazviita.

¹⁰ Dusa mushwapu wako kwendiri; ndinopera kuchaiwa ngenyara yako.

¹¹ Unoorora munhu ngomushwapu ngendaa yokushaisha, unopedza unaku hwake kudai ngounundu; ngegwinyiso munhu weshe uri usina shwiro. Selah.

¹² Izwa mukumbiro wangu, Mambo Mwari, upurutane kuchema kwangu; usanyararira misodzi yangu. Ngokuti ndiri mupfumba wako unopinda kwouri, mupara, kudai ngemadzibaba angu eshe.

¹³ Bvisai kuringira kwenyu kwendiri, kuti ndinyemwerere, ndisati ndabva pano, ndisachazoapo.”