Nduyo 37 - Bhaibheri Rakachena muChindau

¹ Usadzinesa ngendaa yevaiti vezvakashata; usavaitira ndurumwa vanoshanda zvakashata,

² ngokuti vanozofota kudai ngomwenje, vechifota kudai ngenduhwe.

³ Gonda munaMambo Mwari, uite zvakanaka; ndizvo unozogara munyika, ungwaririke ugondeke.

⁴ Dakara munaMambo Mwari, naye unozokupa zvidisiso zvomwoyo wako.

⁵ Pira njira yako kunaMambo Mwari; gonda mwaari, iye unozozviita.

⁶ Unozoita kuti kururama kwako kujeke kudai ngechiveneko, nokururamisirwa ndaa yako kudai ngemasikati.

⁷ Nyarara pamberi paMambo Mwari, umugarire ngokutsengerera; usadzinesa ngendaa youwo unogarisika munjira yake, ngendaa yomunhu unoronga kuita mazano akashata.

⁸ Rekera kutseneka, ubve muushungu. Usadzinesa, zvinokweera kushanda zvakashata zvega.

⁹ Ngokuti vashandi vezvakashata vanozopedzwa, asi avo vanomugarira Mambo Mwari vanozogara nhaka yenyika.

¹⁰ Asi sure kwomukuwo mudoko vakashata vachaparadzwa; kunyazwi unozonasa kuringira ugaro hwavo, aachazoapo akadi.

¹¹ Asi vakapfaa vanozogara nhaka yenyika; vanozodzidakadza ngouwandu hwokunyarara.

¹² Wakashata unorongera wakarurama zano rakashata, echimukwesera mazino ake.

¹³ Asi Mambo Mwari unosheka vakashata, ngokuti unoona kuti zuva ravo roguma.

¹⁴ Vakashata vanoshwamura shoti dzavo, nokukwanya uta hwavo, kuti varige pashi varombo nevatami, kuti vauraye avo vakarurama munjira.

¹⁵ Shoti dzavo dzinozopotya mumwoyo yavo, nembita yavo inozovhunika.

¹⁶ Zvirinani zvishomani zvino uwo wakarurama, kupinda zvizhinji zvine vazhinji vakashata.

¹⁷ Ngokuti mioko yevakashata inozogurwa, asi Mambo Mwari unozogwinyisa vakarurama.

¹⁸ Mambo Mwari unozia mazuva evanhu vakaperera, nenhaka yavo inozogara mhera nariini.

¹⁹ Avazotsverudzwi munguva yokutambudzika; mumazuva enzara vanozogutiswa.

²⁰ Asi vakashata vanopera, nemagaa aMambo Mwari anozodai ngouthende hwemafuro; vanozongarangaka kudai ngechiushi.

²¹ Vakashata vanokwereta vasikahwirinzi, asi vakarurama vanoita zvakanaka, vanogara vechipa.

²² Ngokuti avo vanofumiswa ndiMambo Mwari vanozogara nhaka yenyika; asi avo vanotukwa ndiye vanozopedzwa.

²³ Zvitsiko zvomunhu zvinogwinyiswa ndiMambo Mwari, apo paanodakara munjira yake.

²⁴ Kunyazwi echiwa, aazowi pashi yaamho, ngokuti Mambo Mwari unomugwinyisa ngenyara yake.

²⁵ Ndaiya mudoko, asi zvino ndachena; asi andisati ndaona wakarurama echisiiwa, nokuti vana vake vechipemha chokudya.

²⁶ Mazuva eshe unogara echipa, echikweretesa, nevana vake vanoitwa zvifumiso.

²⁷ Ibvai kunezvakashata, muite zvakanaka; mugare mhera nariini.

²⁸ Ngokuti Mambo Mwari unoda kururama; aazosii vakagondeka vake. Vakarurama vanongwarirwa mhera nariini, asi vana vevakashata vanozopedzwa.

²⁹ Vakarurama vanozogara nhaka yenyika, vagaremwo mhera nariini.

³⁰ Muromo wewakarurama unoereketa ungwaru, norurumi rwake runoereketa zvakarurama.

³¹ Mupango waMwari wake uri mumwoyo mwake; zvitsiko zvake azvitedzuki.

³² Wakashata unohwarira wakarurama, echitsvaka kumuuraya.

³³ Mambo Mwari aazomusii munyara yake, nokuti kumurasha apo ootongwa.

³⁴ Garira Mambo Mwari, uteedze njira yake, naye unozokutunhumadza kuti ugare nhaka yenyika; unozoringira kuparadzwa kwevakashata.

³⁵ Ndakaona wakashata unesimba guru, echikura kudai ngomusidhari weRebhanoni.

³⁶ Zve ndakapindapo, paiya pasisina; kunyazwi ndakamutsvaka, asi aazi kuoneka.

³⁷ Ringisisa munhu wakaperera, muringire munhu wakarurama, ngokuti kumagumisiro kwomunhu uwo kuno kunyarara.

³⁸ Asi vapauki vanozoparadzwa pamwepo; mibarirwana yevakashata inozourawa.

³⁹ Ruponeso rwevakarurama runobva kunaMambo Mwari; ndiye bako ravo panguva yokutambudzika.

⁴⁰ Mambo Mwari unovadetsera, nokuvanunura; unovanunura kubva kunevakashata, avaponese, ngokuti vanohwara mwaari. Nduyo yaDhavhidha Mukumbiro.