Nduyo 36 - Bhaibheri Rakachena muChindau

¹ Chishaishi chinoereketa kunewakashata mukati mumwoyo mwake; akuna kumutya Mwari mukuona kwake.

² Ngokuti unodzichengedzera pachake mukuona kwake, echiti kushata kwake akuoneki nokunyenywa.

³ Mazwi omuromo wake ndikwo kushata nokuchengedza; wakarekera kungwara nokuita zvakanaka.

⁴ Unoronga kushata ari pamubhedhi wake; unodziemesa munjira isikazi kunaka; aarambi zvakashata.

Unaku hwaMwari

⁵ Nyasha dzako dzinorudo, Mambo Mwari, dzinoguma mumatenga; ugondeki hwako hunoguma mumakore.

⁶ Kururama kwako kwakadai ngemitunhu yakakurisisa; kutonga kwako kwakadai ngoruandhle rwakadzamisisa; A Mambo Mwari, unongwarira vanhu nemhuka zvakatodzana.

⁷ A, kunakanyi kwenyasha dzako dzinorudo, A Mambo Mwari! Vanhu veshe vanohwara pashi pomumvuri wemaphaphiro ako.

⁸ Vanogutswa kakurutu ngouwandu hwezvemhatso yako, newe unovamwisa rwizi rwokudakara kwako.

⁹ Ngokuti mwomuri ndimwo mune chinyuka chokupona; mukujeka kwako tinoona kujeka.

¹⁰ Angirira kuitira nyasha dzako dzinorudo kuneavo vanokuzia, noruponeso rwako kunevakarurama mumwoyo.

¹¹ Usatendera rutsoka rwounodzikudza kuti rundipunhure, usatendera nyara yowakashata kuti indidzinge.

¹² Apo ndipo pevanoti kwati kuwa vashandi vezvakashata; vasukumidzirwa pashi, avachakoni kumuka. Nduyo yaDhavhidha.