Nduyo 35 - Bhaibheri Rakachena muChindau

¹ Phikisana navo, Mambo Mwari, avo vanophikisana neni; irwa navo iwewe, avo vanorwa neni!

² Bata chihlangu nomuvhiko, ueme kundidetsera!

³ Shwamura mukhondo nechihlangu, utsiire njira yavo vanonditeera; ronza kunomweya wangu kuti, “Inini ndiri ruponeso rwako.”

⁴ Ngavatsverudzwe vashoorwe avo vanotsvaka mweya wangu. Ngavapetudzwe sure, vakangaidzwe, avo vanopangana ngokuremadzwa kwangu.

⁵ Ngavadai ngezungu rinotorwa ngedutu, nengirosi yaMambo Mwari yechivadzinga.

⁶ Njira yavo ngaiite chidima noutedzi, nengirosi yaMambo Mwari yechivarumbirira.

⁷ Ngokuti pasina ndaa vakandifishira mambure avo; pasina ndaa vakatsira mweya wangu hunza.

⁸ Kuurawa ngakugume kwevari vasikazii; nomumbure waakafisha ngauvabate; ngavawiremwo mukati mwawo, kuita kuparadzwa kwavo.

⁹ Zvino mweya wangu unozodakara munaMambo Mwari, nokukudza muruponeso rwake.

¹⁰ Magodo angu eshe anozoti, “Mambo Mwari, ndiani wakadai ndiwe? Unonunura murombo kubva kuneavo vanesimba rinopinda ravo, unonunura murombo nomutami kubva kunouwo unomuchakata.”

¹¹ Zvapupu zvisikazi kururama zvinomiruka; zvinondibvunza zviro zvendisikazii.

¹² Vanondithusa ngezvakashata pandau yezvakanaka; mweya wangu unopera simba.

¹³ Asi ini, mukurwara kwavo ndakasimira masaka; ndakatambudza mweya wangu ngokuera kudya; ndakakumbira ndakakotamisa soro rangu paditi.

¹⁴ Ndakamutambudzikira kudai ngemungani wangu nokuti hama yangu. Ndakaputaputa ndechitsumba, kudai ngounochema mai ake, ndakakotama pashi nomukuchema.

¹⁵ Asi mukupererwa kwangu vakaungana vakadakara, vakadziunganidza pachavo pamwepo kurwisana neni; vanehasha vendisikazii vakandibweshura, avazi kurekera.

¹⁶ Kudai ngevaiti vejee vanonyanya kundiitira jee kwakawanda, vakandikwetsera mazino avo.

¹⁷ Mambo Mwari, unozoringira metsa mukuwo wakaitawani? Nunura mweya wangu kubva mukuparadza kwavo, nunura ndaramo yangu kubva mumhondoro!

¹⁸ Zvino ndinozokubonga mumushongano mukuru; ndinozokukudza pakati pevanhu vazhinji.

¹⁹ Usatendera avo vari magaa angu pasina ndaa, kuti vadakare padera pangu; usatendera kuti vachonyane ngemadziso avo, avo vanondizonda ndisina ndaa.

²⁰ Ngokuti avaereketi kunyarara, asi vanopangana mazwi okuchengedzera, kuneavo vanogara ngokunyarara munyika.

²¹ Vanondishamira kakurutu miromo yavo kurwisana neni; vanoti, “A, A, madziso edu azviona.”

²² Iwewe wazviona, A Mambo Mwari; usanyarara! A Mambo Mwari, usaita uri kuretu kubva kwendiri!

²³ Muka! Umiruke kunditongera zvakarurama, uemerere ndaa yangu, Mwari wangu naMambo Mwari wangu!

²⁴ Ndipembedze, Mambo Mwari, Mwari wangu, kudai ngokururama kwako; usavatendera kuti vadakare padera pangu.

²⁵ Usavatendera mumwoyo mwavo kuti vati pachavo, “A, ndizvo zvaida mwoyo yedu.” Usavatendera kuti varonze kuti, “Tamumedza.”

²⁶ Ngavatsverudzwe nokukangaidzwa veshe avo vanokarira kuremadzwa kwangu; avo vanodzikudza pachavo kurwisana neni, ngavafukidzwe nokutsverudzwa nokushoorwa.

²⁷ Ngavadaidzire ngokudakara vadakadzwe, avo vanodakarira kururamisirwa kwangu, ngavagare vechiti, “Mambo Mwari mukuru, uwo unodakara mukugarisika kwomuranda wake.”

²⁸ Zvino rurumi rwangu runozoereketa ngokururama kwako nokwokukudzwa kwako zuva reshe. KuneMutungamiriri woKuemba. Nduyo yaDhavhidha, Muranda waMambo Mwari.