Nduyo 34 - Bhaibheri Rakachena muChindau

¹ Ndinozokudza Mambo Mwari nguva dzeshe kukudzwa kwake kunozogara kuri mumuromo mwangu.

² Mweya wangu unoganza ndiMambo Mwari; vakapfaa ngavazwe, vadakare.

³ Kurisai Mambo Mwari neni, ngatikudze zina rake pamwepo.

⁴ Ndakatsvaka Mambo Mwari, naye wakandipingura, akandinunura kubva mukutya kwangu kweshe.

⁵ Ringirai kwaari mujekiswe; ndizvo hope dzavo adzizotsverudzwi mhera nariini.

⁶ Uyu munhu murombo wakachema, Mambo Mwari wakamuzwa, wakamuponesa mumadambudziko eshe.

⁷ Ngirosi yaMambo Mwari inogara yakatendenedza avo vanomutya nokuvanunura.

⁸ Edzai, muone kuti Mambo Mwari wakanaka; unomuchena munhuwo unohwara mwaari.

⁹ Ityai Mambo Mwari, imwimwi vakacheneswa vake, ngokuti avo vanomutya avana chevanotama

¹⁰ Mhondoro itsva dzinotama, dzechifa ngenzara, asi avo vanomutsvaka Mambo Mwari avatami nachimwe chiro chakanaka.

¹¹ Uyai, imwimwi vana, mupurutane kwendiri; ndinozomudzidzisa kutya Mambo Mwari.

¹² Ndiani munhu unodisa ndaramo, unodisa mazuva akawanda okuona zvakanaka?

¹³ Ngwarira rurumi rwako kubva kunezvakashata, nemiromo yako kuti isaereketa kuchengedza.

¹⁴ Ibva mukushata, uite zvakanaka; tsvaka kunyarara ukuteere.

¹⁵ Madziso aMambo Mwari anoringira vakarurama, nenzee dzake dzakabeukira kuchema kwavo.

¹⁶ Hope yaMambo Mwari inotsenekera avo vanoita zvakashata, kugura kukarakadzwa kwavo panyika.

¹⁷ Naapo vakarurama vachema, Mambo Mwari unovazwa, nokuvanunura kubva mumadambudziko avo eshe.

¹⁸ Mambo Mwari uri pasinde peavo vakasvipa mwoyo, unoponesa avo vanomwoyo yakapwanyika.

¹⁹ Madambudziko owakarurama mazhinji, asi Mambo Mwari unomununura kubva kwaari eshe.

²⁰ Unongwarira magodo ake eshe; akuna narimwe rawo rinozoguka.

²¹ Kushata kunozouraya vakashata, navo vanozonda vakarurama vanozoitirwa ndaa.

²² Mambo Mwari unoripira mweya yevaranda vake; akuna naumwe wavo vanohwara mwaari unozoitirwa ndaa. Nduyo yaDhavhidha.