Nduyo 33 - Bhaibheri Rakachena muChindau

Nduyo yoKukudza

¹ Dakarai munaMambo Mwari, imwimwi mwakarurama; kukudza kunosisira vanhu vakarurama.

² Kudzai Mambo Mwari ngembira; muembe kumukudza ngechidangari chinetambo gumi.

³ Embai kwaari ngoma itsva; ridzai ngokungwara patambo ngeizwi guru.

⁴ Ngokuti izwi raMambo Mwari rakarurama, nemishando yake yeshe inoitwa ngokugondeka.

⁵ Unoda kururama nokutonga kwakanaka; nyika yakazara ngenyasha dzinorudo dzaMambo Mwari.

⁶ Ngeizwi raMambo Mwari matenga akasikwa, nehondo dzawo dzeshe ngomweya womuromo wake.

⁷ Wakaunganidza mvura yoruandhle pamwepo kudai ngeiri mujomeya; unotutira ruandhle mukudzama kwemirindi.

⁸ Nyika yeshe ngaitye Mambo Mwari; veshe vagari vomunyika ngavaeme vechihuta ndiye.

⁹ Ngokuti wakaereketa, nazvo zvakaitika; wakapanga, zvikatsimiswa.

¹⁰ Mambo Mwari unoparadza mazano emadzinza kuita asina shwiro; unoita kuti urongwa hwevanhu usaita shwiro.

¹¹ Zano raMambo Mwari rinotsima mhera nariini, mirangariro yomwoyo wake iri kumazero eshe.

¹² Rinomuchena dzinza iro rinoti Mwari waro ndiMambo Mwari, vanhu vaakadzitsanangurira kuvaita nhaka yake.

¹³ Mambo Mwari unoringira pashi kubva mugore; unoona vakororo veshe vevanhu.

¹⁴ Unoringira ari muugaro hwoumambo hwake veshe vagari venyika,

¹⁵ aye unoumba mwoyo yeshe, unoringira mishando yavo yeshe.

¹⁶ Mambo aaponeswi ngouwandu hwehondo yake; murwi wehondo aaponeswi ngesimba rake guru.

¹⁷ Hachi rehondo magondero asina shwiro okunyisa, nesimba raro guru arikoni kuponesa.

¹⁸ Ngegwinyiso dziso raMambo Mwari riri padera peavo vanomutya, padera peavo vanogonda nyasha dzake dzinorudo,

¹⁹ kununura mweya yavo kubva murufu, nokuvaponesa panguva yenzara.

²⁰ Mweya yedu yakagarira Mambo Mwari; ndiye mudetseri wedu nechihlangu chedu.

²¹ Mwoyo yedu inodakara mwaari, ngokuti tinogonda muzina rake rakachena.

²² Rudo rwako rwakagwinya, A Mambo Mwari, ngarugare padera pedu, kudai ngezvetinogonda mwouri. Nduyo yaDhavhidha, apo paakanyepera kupenga pamberi paAbhimerekhi, uwo wakamurumbirira, naye wakaenda.