Nduyo 32 - Bhaibheri Rakachena muChindau

¹ Unomuchena uwo unekupauka kwake kwakungurirwa, unechishaishi chake chafishwa.

² Unomuchena munhuwo uwo Mambo Mwari waasikaerengeri zvakashata, nouwo mumweya mwake amuna kuchengedza.

³ Naapo pendakanyarara, muiri wangu wakatsakara, ngokugwimba kwangu mutakatiro wezuva reshe.

⁴ Ngokuti masikati nousiku nyara yako yairema padera pangu; kugwinya kwangu kwakaomeswa kudai ngokuomeswa kwokupisha kwezienza. Selah.

⁵ Zvino ndakatenderuka chishaishi changu kwouri, neni andizi kufisha kushaisha kwangu; ndakati, “Ndinozotenderuka kupauka kwangu kunaMambo Mwari,” newe wakakungurira kushata kwechishaishi changu. Selah.

⁶ Ndizvo veshe avo vakarurama ngavakumbire kwouri panguva yokutambudzika; apo yokwira ndambi inesimba, aizovagumiri.

⁷ Iwewe uri ugaro hwangu hwokuhwara; unondingwarira kubva mukutambudzika; unozonditendenedza ngenduyo dzokusunhurwa. Selah.

⁸ Ndinozokuonisa nokukudzidzisa njira younozohamba ndiyo; ndinozokupanga ngedziso rangu.

⁹ Musadai ngehachi nenyurusi, zvisina kuzwisisa; kuita kwawo anosisira kuti asungwe mikhayo nematomu, kuti akwedzere kwouri.

¹⁰ Madambudzo mazhinji ngeeuwo wakashata, asi uwo unogonda munaMambo Mwari, nyasha dzinozomutendenedza.

¹¹ Dakarai munaMambo Mwari, mudakadzwe, imwimwi mwakarurama; mudaidzire ngokudakara, mweshe imwimwi mwakarurama mumwoyo.