Nduyo 31 - Bhaibheri Rakachena muChindau

¹ Ndinohwara mwouri, Mambo Mwari; usatenda kuti nditsverudzwe mhera nariini; ndinunure mukururama kwako.

² Ungamisira nzee yako kwendiri; undinunure ngokukasira. Ita buwe rokuhwara rakagwinya kwendiri, mhatso yorusvingo yoruponeso.

³ Iwewe ngegwinyiso ndiwe buwe rangu norusvingo rwangu; ngendaa yezina rako, nditungamire undihambise;

⁴ ndibvise mumambure evakanditeya ndiwo pakasitika, ngokuti iwewe ndiwe bako rangu rokuhwara.

⁵ Munyara yako ndinopira mweya wangu; wakandiripira, Mambo Mwari, Mwari wakagondeka.

⁶ Ndinovazonda avo vanopinimidza zviro zvisina shwiro, asi inini ndinogonda munaMambo Mwari.

⁷ Ndinozokudza nokudakara munyasha dzako, ngokuti iwewe wakaona kutambudzika kwangu; wakazia mweya wangu mumatambudziko.

⁸ Auzi kundipira munyara mwegaa; wakaemesa tsoka dzangu mundau yakatarauka.

⁹ Ndiitire nyasha, Mambo Mwari, ngokuti ndiri mudambudziko; madziso angu anoperezeka ngokutambudzika, mweya wangu nomuiri wanguwo.

¹⁰ Ngokuti ndaramo yangu inopera ngokusvipa mwoyo, nemakore angu ngokugwimba; simba rangu ropera ngendaa yokushaisha kwangu, nemagodo angu apera simba.

¹¹ Ndaa chitsverudzo kumagaa angu eshe, kakurutu kunevaakirwana vangu, ndiri chiro chityiso kuneavo vanondizia; avo vanondiona munjira vanonditiza.

¹² Ndariyarikanwa kudai ngomunhu wakafa, ndadai ngechidziyo chakapwanyika.

¹³ Ngokuti ndinozwa kuvherevhedza kwevazhinji, kukaruka kuri kumarupande eshe! Vachapangana pamwepo ndini, apo vanopangana ngokundiuraya.

¹⁴ Asi ndinogonda mwouri, A Mambo Mwari; ndinoti, “Iwewe ndiwe Mwari wangu.”

¹⁵ Nguva dzangu dziri munyara mwako; ndinunure kubva munyara mwemagaa angu, nokuneavo vanonditambudza.

¹⁶ Hope yako ngaijeke padera pomuranda wako; ndiponese munyasha dzako dzinorudo.

¹⁷ Usatenda kuti nditsverudzwe, A Mambo Mwari, ngokuti ndinodaidza kwouri; vakashata ngavatsverudzwe; ngavanyaradzwe muSheori.

¹⁸ Miromo inonyepa ngainyaradzwe, inoereketa kurwisana nevakarurama, ngokudzikudza nokunyenyeredza.

¹⁹ A, kukuranyi kwounaku hwako hwowakangwaririra avo vanokutya, hwowakaitira avo vanohwara mwouri, pamberi pevakororo vevanhu!

²⁰ Mukufishika kwehope yako unozovafisha kubva kumazano evanhu; unozovangwarira pakasitika mutende rako kubva kuhasha dzendimi.

²¹ Ngaakudzwe Mambo Mwari, ngokuti wakandionisa nyasha dzake dzinorudo dzinoshamisa, apo pendaemeswa ndakadai ngeguta rakakombwa.

²² Inini ndakati mukukaruka kwangu, “Ndagurwa kubva pamberi pemadziso ako.” Asi wakazwa iwewe izwi rokupota kwangu apo pendakachema kwouri kuti undidetsere.

²³ Idai Mambo Mwari, imwimwi mweshe vakacheneswa vake. Mambo Mwari unongwarira vanogondeka, asi unounzidzira kakurutu uwo unoita ngokudzikudza.

²⁴ Gwinyai, mwoyo yenyu ngaishinge, mweshe imwimwi munogonda munaMambo Mwari. Nduyo yaDhavhidha.