Nduyo 28 - Bhaibheri Rakachena muChindau

¹ Ndinodaidza kwouri, Mambo Mwari; buwe rangu, usandinyararira, ngokuti kudai wechindinyararira, ndingazodai ndivo vanonzvaira muhunza.

² Izwa izwi rokupota kwangu apo ndoodaidza kwouri kuti undidetsere, apo ndoomirudzira nyara dzangu kuugaro hwako hwakachena.

³ Usandikweya pamwepo nevakashata, nevashandi vezvakashata, avo vanoereketa ngokunyarara kuvaakirwana vavo, asi kushata kuri mumwoyo yavo.

⁴ Vaunzidzire kudai ngemishando yavo, nokudai ngokushata kwezviito zvavo; vaunzidzire kudai ngemishando yenyara dzavo; upetudzire kwevari kudai ngezvinovasisira.

⁵ Ngokuti avanyeri ngemishando yaMambo Mwari, nokuti mishando yenyara dzake, unozovapwanyira pashi, asikazovaakizve.

⁶ Ngaabongwe Mambo Mwari, ngokuti wakazwa izwi rokupota kwangu.

⁷ Mambo Mwari ndiye simba rangu nechihlangu changu; mwoyo wangu unogonda mwaari; ndizvo ndinodetserwa, nomwoyo wangu unodakara kakurutu; nengoma yangu ndinozomubonga.

⁸ Mambo Mwari ndiye simba revanhu vake; ndiye bako roruponeso kunewakadzodzwa wake.

⁹ Ponesa vanhu vako, ufumise nhaka yako; ita muushi wavo, uvatware mhera nariini. Nduyo yaDhavidha.