Nduyo 27 - Bhaibheri Rakachena muChindau

¹ Mambo Mwari ndiye kujeka kwangu noruponeso rwangu; ndiani wendingazotya? Mambo Mwari isimba rokupona kwangu; ndiani wendingazotya?

² Apo vaiti vezvakashata vanondigumira kuti vadye nyama yangu, eya, magaa angu nevanondizonda, vanozopumhunwa nokuwa.

³ Kunyazwi hondo yanyandikomba, mwoyo wangu auzotyi; kunyazwi hondo yanyandimukira, zvakanyadaro ndinozogonda.

⁴ Chiro chimwe chendakakumbira kunaMambo Mwari, ndicho chendinozotsvaka: kuti ndigare mumhatso yaMambo Mwari mazuva eshe okurarama kwangu, kuti ndiringire unaku hwaMambo Mwari, nokubvunza mutemperi rake.

⁵ Ngokuti ngezuva rokutambudzika unozondifisha pakasitika muugaro hwake; unozondifisha pakasitika mutende rake; unozondimirudza padera pebuwe.

⁶ Zvino soro rangu rinomirudzwa padera pamagaa angu anonditendenedza, neni ndinozopira mutende rake midiro yokudakara; ndinozoemba zvakanaka kukudza Mambo Mwari.

⁷ Izwai, Mambo Mwari, apo ndodaidza ngeizwi rangu; ndiitire nyasha, undipingure!

⁸ Mwoyo wangu unoti, “Uya, tsvaka hope yake!” Ndinotsvaka hope yako, Mambo Mwari.

⁹ Usafisha hope yako kubva kwendiri. Usapetudza muranda wako muushungu, iwewe waiya mudetseri wangu. Usandirasha nokuti kundisiya, Mwari woruponeso rwangu!

¹⁰ Kudai baba angu namai angu vandisiya, Mambo Mwari unozonditora.

¹¹ Ndidzidzise njira yako, A Mambo Mwari; unditungamirire munjira yakarurama, ngendaa yemagaa angu.

¹² Usandipira mukuda kwemagaa angu, ngokuti zvapupu zvemanyepo zvandimukira, naavo vanofemurika hasha.

¹³ Ndinotenda kuti ndinozoona kunaka kwaMambo Mwari munyika yevanopona.

¹⁴ Garira Mambo Mwari; uite wakagwinya, nomwoyo wako ngaushinge; garira Mambo Mwari. Nduyo yaDhavhidha.