Nduyo 25 - Bhaibheri Rakachena muChindau

¹ Ndinomirudzira mweya wangu kwouri, Mambo Mwari.

² A Mwari wangu, ndinogonda mwouri; usatendera kuti nditsverudzwe; usatendera kuti magaa angu andinyise.

³ Usatendera avo vanokugarira kuti vatsverudzwe; ngavatsverudzwe avo vanoita ngokuchengedza pasina ndaa.

⁴ Ndiite kuti ndizie njira dzako, A Mambo Mwari; ndidzidzise njira dzako.

⁵ Nditungamirire mugwinyiso rako, undidzidzise, ngokuti iwewe uri Mwari woruponeso rwangu, ndinokugarira zuva reshe.

⁶ Karakadza ngenyasha dzako, A Mambo Mwari, nenyasha dzako dzinorudo rwakakura, ngokuti zvaindoiyapo kare nekare.

⁷ Usakarakadza zvishaishi zvoutsva hwangu, nokuti zvipauko zvangu; kudai ngouwandu hwenyasha dzako dzinorudo rukurutu, ndikarakadze, ngendaa yokunaka kwako, A Mambo Mwari!

⁸ Mambo Mwari wakanaka, wakarurama; ndizvo unodzidzisa vashaishi njira.

⁹ Unotungamirira vakapfaa mune zvakarurama, nokudzidzisa njira yake kunevakapfaa.

¹⁰ Dzeshe njira dzaMambo Mwari ngedzenyasha huru norudo nokugondeka, naavo vanongwarira chitenderano chake nouchapupu hwake.

¹¹ Ngendaa yezina rako, A Mambo Mwari, kungurira kushaisha kwangu, ngokuti kwakakura.

¹² Ngouri munhuwo unomutya Mambo Mwari? Unozomudzidzisa njira yaanozotsanangura.

¹³ Unozogara mukubudirira; vana vake vanozogara nhaka yenyika.

¹⁴ Ukama hwaMambo Mwari uri kwevari vanomutya; unoita kuti chiziikanwe kwevari chitenderano chake.

¹⁵ Madziso angu anoringira kunaMambo Mwari nguva dzeshe, ngokuti unozobudisa tsoka dzangu kubva mumambure.

¹⁶ Kunukukira kwendiri, undiitire nyasha, ngokuti ndine chishuwo nedambudziko.

¹⁷ Dusa madambudziko omwoyo wangu, nokundibvisa mukukakaseka kwangu.

¹⁸ Rangarira dambudziko rangu nokurwadziwa kwangu, nokukungurira zvishaishi zvangu zveshe.

¹⁹ Rangarira magaa angu manganai, noushungu hwakadini hwevanondizonda ndihwo.

²⁰ Ngwarira mweya wangu, undinunure; usatenda kuti nditsverudzwe, ngokuti ndinohwara mwouri.

²¹ Kugondeka nokururama ngazvindingwarire, ngokuti ndinogarira iwewe.

²² Ripira Isuraeri, A Mwari, kubva mumadambudziko ake eshe. Nduyo yaDhavhidha.