Nduyo 22 - Bhaibheri Rakachena muChindau

¹ Mwari wangu, Mwari wangu, wandisiirenyi? Uri kuretu kwakadai ngenyi kubva pakundidetsera, kubva kumazwi okugwimba kwangu?

² A Mwari wangu, ndinokudaidza masikati, asi aundipinguri; nenguva yousiku andizorori.

³ Asi iwewe wakachena, unogara mukukudzwa kwaIsuraeri.

⁴ Madzibaba edu akagonda mwouri; vakagonda, newe wakavanunura.

⁵ Vakadaidzira kwouri navo vakanunurwa; vakagonda mwouri, navo avazi kutsverudzwa.

⁶ Asi inini ndiri honye, andiri munhupi; ndiri chitsverudzo kunevamweni, nounoshoorwa ngevanhu.

⁷ Veshe vanondiona, vanondisheka kundiitira jee; vanochenya miromo, vanodzungudza masoro vechiti,

⁸ “Wakagonda munaMambo Mwari, ngaamusunhure; ngaamununure, uwo waanodakara ndiye.”

⁹ Asi ndiwe wakandibudisa kubva mundani, wakandingwarira zvakanaka paditi ramai angu.

¹⁰ Ndakakandirwa padera pako, kubvira mundani pakubarwa kwangu; nokubvira pevakandibara mai angu, iwewe ndiwe Mwari wangu.

¹¹ Usatarauka kwendiri, ngokuti dambudziko riri pasinde, ngokuti akuna naumwe wokundidetsera.

¹² Mikono mizhinji inonditendenedza, mikono yakagwinya yeBhashani inonditendenedza;

¹³ inondishamira miromo yayo, kudai ngemhondoro inokara nokubhonga.

¹⁴ Ndinodururwa kudai ngemvura, nemagodo angu eshe arungunuka; mwoyo wangu wakadai ngemhura; unonyunguruka mukati mwangu.

¹⁵ Muromo wangu waoma kudai ngechiwenda, norurumi rwangu rwanamira mutsaya dzangu. Wandiradzika mubukuta rorufu.

¹⁶ Ngokuti imbwa dzandiunganira; chikwata chevaiti vezvakashata chandiunganira. Vakabvajura nyara dzangu netsoka dzangu.

¹⁷ Ndingaerenga magodo angu eshe. Vanondiringira vechindidzvuturira;

¹⁸ vanopaurirana zvokusimira zvangu pakati pavo, vanoitira mabhigidha zvokusimira zvangu.

¹⁹ Asi iwewe, Mambo Mwari, usanditaraukira! Iwewe simba rangu, kasira kundidetsera!

²⁰ Nunura mweya wangu kubva kushoti, kupona kwangu kubva kusimba rembwa!

²¹ Ndiponese kubva pamuromo wemhondoro! Kubva panyanga dzenyati wakandinunura.

²² Ndinozoteketesa zina rako kuhama dzangu; mukati mwembungano ndinozokukudza.

²³ Imwimwi munotya Mambo Mwari, mukudzenyi! Mweshe imwimwi mibarirwana yaJakobe, muirikidzenyi; mumutye, imwimwi mweshe mibarirwana yaIsuraeri!

²⁴ Ngokuti aazi kushoora nokuti kunyenya dambudziko rounotambudzika; aazi kufisha hope yake kubva kwaari; asi wakamuzwa apo pewakachema kwaari.

²⁵ Kukudza kwangu kunobva kwouri mumbungano huru; ndinozoripa mhiko dzangu pamberi pavo vanomutya.

²⁶ Varombo vanozodya, vagutiswe; avo vanomutsvaka vanozokudza Mambo Mwari. Mwoyo yenyu ngaipone mhera nariini!

²⁷ Veshe vokumagumo enyika vanozokarakadza, vahwirire kunaMambo Mwari. Mhuri dzeshe dzemadzinza dzinozodira pamberi pake.

²⁸ Ngokuti umambo ngohwaMambo Mwari, naye unotonga padera pemadzinza.

²⁹ Eshe makurudza omunyika anozodya echidira; veshe vanodzaka mubukuta vanozokotama pamberi pake, nouwo usikakoni kuponesa ndaramo yake.

³⁰ Mibarirwana ichauya inozomushandira; mibarirwana ichauya inozoronzerwa ngendaa yaMambo Mwari,

³¹ nayo inozoteketesa kururama kwake kuvanhu vasati vabarwa, vechiti ndiye wazviita. Nduyo yaDhavhidha.