Nduyo 19 - Bhaibheri Rakachena muChindau

¹ Matenga anoteketesa uthende hwaMwari; nomudenga munoonisa mishando yenyara dzake.

² Zuva rimwe ngarimwe rinoereketa, nousiku humwe ngahumwe hunoonisa ruziyo.

³ Akuna kuereketa nokuti mazwi; izwi ravo arizwiki;

⁴ asi izwi ravo rinoenda kunyika yeshe, nemazwi avo anoguma kumagumo enyika. Mukati mwematenga wakaemesa ugaro hwezuva,

⁵ rinobuda kudai ngomukwambo unobuda mukamera rake romuchadho, kudai ngetsvisi rinorumba mujaho waro rechidakara.

⁶ Kubuda kwaro kunobva kwakagumira matenga, nokutenderera kwaro kunoguma kumagumo aro; akuna chakafishika mukupisha kwaro.

Mupango waMambo Mwari

⁷ Mupango waMambo Mwari wakaperera, unounzira mweya; mitemo yaMambo Mwari yakagwinya, inongwadza vasina mazano;

⁸ zvidzidziso zvaMambo Mwari zvakarurama, zvinodakadza mwoyo; mipango yaMambo Mwari yakachena, inojekisira madziso;

⁹ kutyisa kwaMambo Mwari kwakaperera, kunogara mhera nariini; zvitongero zvaMambo Mwari zviri gwinyiso, zvakarurama zveshe pamwepo.

¹⁰ Zvinopinda kuemurwa kunomukore, kunyazwi kunomukore wakapinda kuengurwa kakurutu; zvinopinda kutapira kuneuchi, nokubomha kwemisoro.

¹¹ Ndizvozve muranda wako unonyowedzwa; mukuzvingwarira zvino musharo mukuru.

¹² Asi ndiani ungaonesesa zvishaishi zvake? Ndipembedze kuzvishaishi zvakafishika.

¹³ Pinga muranda wako kuzvishaishi zvokudzikudza; ita kuti zvisatonga padera pangu. Zvino ndinozoita wakaperera, ndinozoita wakapembedzwa kunezvishaishi zvikuru.

¹⁴ Mazwi omuromo wangu nokupinimidza kwomwoyo wangu ngazviashirike mukuona kwako, A Mambo Mwari, buwe rangu nomuripiri wangu. KuneMutungamiriri woKuemba. Nduyo yaDhavhidha.