Nduyo 18 - Bhaibheri Rakachena muChindau

¹ Ndinokuda, A Mambo Mwari, simba rangu.

² Mambo Mwari ibuwe rangu, norusvingo rwangu, nomununuri wangu, Mwari wangu, buwe rangu umwo mwendinohwara, chihlangu changu, norunyanga rworuponeso rwangu, rusvingo rwangu rwakagwinya.

³ Ndinodaidza kunaMambo Mwari uwo unosisira kukudzwa; ndizvo ndinozoponeswa kubva kumagaa angu.

⁴ Mapote orufu akandikomba; maguwe okushata akandimbonya.

⁵ Mapote eSheori akandipombera; mirau yorufu yandiringira.

⁶ Mukutambudzika kwangu ndakadaidzira kunaMambo Mwari; ndakachemera rudetso kunaMwari wangu. Wakazwa izwi rangu ari mutemperi rake, nokuchema kwangu pamberi pake kwakazwika munzee dzake.

⁷ Zvino nyika yakazungunyika, ikatengendeka; nemadzeyo emitunhu akatengendekawo akangundangunda, ngokuti waiya anyangadzwa.

⁸ Chiushi chapwititika kubva mumiro dzake, nomuriro unoparadza kubva mukanwa mwake, masimbe akabaka kubva kwaari.

⁹ Wakabaura matenga, akadzaka pashi; chidima chakapetwa chakaa pashi petsoka dzake.

¹⁰ Wakagadha padera pekherubhi, akambururuka; wakambururuka ngokukasira ari padera pemaphaphiro edutu.

¹¹ Wadzifukidza ngechidima chakamutendenedza, chokufuka chake makore akakora akasvipa ngechidima chemvura.

¹² Kubva mukujeka kwaiya pamberi pake kwakabuda kubva pakati pemakore ake matsanza nemasimbe omuriro.

¹³ Mambo Mwari wakatinhirawo ari mugore, noUri-padera-pazveshe wakaereketa izwi rake, matsanza nemasimbe omuriro.

¹⁴ Wakaposhera misee yake akavaparadza; ngokupenya kwemheni dzakawanda, wakavanyisa.

¹⁵ Zvino migero yemvura yakaoneka, nemadzeyo enyika akabudiswa pamhene ngokukaraidza kwako, Mambo Mwari, ngokuotsirwa kwomweya wemiro dzako.

¹⁶ Wakaguma pashi kubva mudenga, akanditora; akandinyura kubva mumvura inesimba.

¹⁷ Wakandinunura kubva kugaa rangu rinesimba, nokubva kuneavo vaindizonda, ngokuti vaindikurira yaamho.

¹⁸ Vakandigumira ngezuva rokukakaseka kwangu; asi Mambo Mwari wakaita mugwinyisi wangu.

¹⁹ Wakandiunza muugaro hwakafara; wakandinunurira ngokuti wakadakara ndini.

²⁰ Mambo Mwari wakandiitira kudai ngokururama kwangu; wakandipa musharo kudai ngokuchena kwenyara dzangu.

²¹ Ngokuti ndakangwarira njira dzaMambo Mwari, andizi kupauka kuita zvakashata kubva kunaMwari wangu.

²² Ngokuti zvitongero zvake zveshe zvaiya pamberi pangu, andizi kurasha zviemeso zvake kubva kwendiri.

²³ Ndaiya ndakaperera pamberi pake, ndakadzingwarira pachangu kubva mukushata.

²⁴ Ndizvo Mambo Mwari wakandipa musharo kudai ngokururama kwangu, kudai ngokuchena kwenyara dzangu mukuona kwake.

²⁵ Kunouwo wakagondeka, iwewe unozodzionesa uri wakagondeka; kunomunhu wakaperera, unozodzionesa pachako uri wakaperera.

²⁶ Kunouwo wakacheneswa unozodzionesa pachako uri wakashata. kunomupauki unozodzionesa uri unopesana.

²⁷ Ngokuti unoponesa vanhu vakapfaa; asi unodzasa pashi madziso anodzikudza.

²⁸ Ndiwe unobasira chibani changu; Mambo Mwari, Mwari wangu, unojekisa chidima changu.

²⁹ Kubudikidza ndiwe ndinoparadza hondo; nokubudikidza ndiMwari wangu ndinodarika rukumbati.

³⁰ Uyu Mwari, njira yake yakaperera; chigondiso chaMambo Mwari chiri gwinyiso; uri chihlangu kwevari veshe vanohwara mwaari.

³¹ Ngokuti ndiani Mwari ngokubanze kwaMambo Mwari? Ndiani uri buwe ngokubanze kwaMwari wedu?

³² Mwari unondisimidza ngesimba, nokuita kuti njira yangu iperere.

³³ Unoita kuti tsoka dzangu dzidai ngedzengururu, nokundiemesa pakangwaririka pakaturama.

³⁴ Unodzidzisa nyara dzangu kurwa hondo, kuti mioko yangu ikwamure uta hwethusi.

³⁵ Iwewe wakandipa chihlangu choruponeso rwako, nenyara yako yokumudyo yakanditsimisa; kudetsera kwako kwakanditunhumadza.

³⁶ Wakapamhamisa zvitsiko zvangu pashi pangu, tsoka dzangu adzizi kutedzuka.

³⁷ Ndakarumbirira magaa angu, ndikaabata; andizi kupetuka metsa apere.

³⁸ Ndakaabaira pashi, kuti asakona kumiruka; vakawira pashi petsoka dzangu.

³⁹ Ngokuti wakandisimidza ngesimba rokurwa; wakanzvairisa kwendiri avo vakandimukira.

⁴⁰ Wakaita kuti magaa angu andifuratire, naavo vanondizonda ndakavaparadza.

⁴¹ Vakadaidzira kudetserwa, asi paiya pasina wokuvaponesa; vakadaidzira kunaMambo Mwari, asi aazi kuvapingura.

⁴² Naapo ndakavakuya kuti vadai ngebukuta pamberi pedutu; ndakavarasha kudai ngematope epato.

⁴³ Wakandinunura kubva muhasha nevanhu; wakandiita soro remadzinza; vanhu vendisaizia vakandishandira.

⁴⁴ Apo vozwa ndini, vakandipurutana; venyika mukanza vakauya vechidzipfaisa kwendiri.

⁴⁵ Vapara vakagumirwa, vakabuda vechitetemara kubva mumapako avo.

⁴⁶ Mambo Mwari unopona! Ngarikudzwe buwe rangu; ngaakudzwe Mwari woruponeso rwangu,

⁴⁷ Mwari unondiunzidzira, unondinyisira vanhu vari pashi pangu;

⁴⁸ uwo unondinunura kubva kumagaa angu; ngegwinyiso unondimirudza padera paavo vanondimukira; unondinunura kubva kuzvigebenga.

⁴⁹ Ngeizvi ndinozokukudza, Mambo Mwari, pakati pemadzinza, ndinozoemba kukudza zina rako.

⁵⁰ Unopa kunyisa kukuru kunamambo wake, nokuonisa nyasha dzinorudo kunewakadzodzwa wake, kunaDhavhidha nokumibarirwana yake mhera nariini. KuneMutungamiriri woKuemba. Nduyo yaDhavhidha.