Nduyo 17 - Bhaibheri Rakachena muChindau

¹ Izwa ndaa yakarurama, A Mambo Mwari, purutana kuchema kwangu. Izwa mukumbiro wangu usikabudi ngomuromo unochengedzera.

² Kutongwa kwangu ngakubve kwouri; madziso ako ngaaone kururama.

³ Kudai wechiedza mwoyo wangu, kudai ukandihambira usiku, kudai wechindiedza, auzooni kushata kwendiri; ndakagura kuti muromo wangu usashaisha.

⁴ Ngendaa yemishando inoitwa ngevamweni, ngeizwi remiromo yako ndakadzingwarira kubva munjira yezvigebenga.

⁵ Zvitsiko zvangu zvakarambira munjira dzako, tsoka dzangu adzizi kutedzuka.

⁶ Ndinodaidzira kwouri, ngokuti unozondipingura, A Mwari; ungamisira nzee yako kwendiri, uzwe mazwi angu.

⁷ Onisa nyasha dzako dzinoshamisa dzinorudo, iwewe muponesi wevanotsvaka kuhwara kubva kumagaa avo ngenyara yako yokumudyo.

⁸ Ndingwarire kudai ngemboni yedziso; ndifishe pashi pomumvuri wemaphaphiro ako,

⁹ kubva kunevakashata avo vanonditambudza, nokumagaa angu anouraya, anonditendenedza.

¹⁰ Vanokonya mwoyo yavo kuti vasaita nyasha, vanoereketa kudzikudza ngemiromo yavo.

¹¹ Vanondirumbirira, vanondikomba; vanobeura madziso avo kutirigira pashi pamavhu.

¹² Vakadai ngemhondoro inokarira nyama yayo, kudai ngemhondoro itsva inohwarira muugaro hwakafishika.

¹³ Miruka, A Mambo Mwari, uemesedzane navo, uvarige pashi. Nunura mweya wangu kubva kunevakashata ngeshoti yako,

¹⁴ kubva kunevanhu ngenyara yako, A Mambo Mwari, kubva kunevanhu vomunyika, avo chikoaniswa chokupona kwavo chiri chomunyika ino. Ndani dzavo ngadzizadzwe ngoupfumi hwako hwewakavangwaririra. Vana vavo ngavapuwe zvakawandisa; ngavasiire vana vavo vadoko zvakasara.

¹⁵ Asi pachangu ndinozoona hope yako mukururama; ndinozokwaniswa apo ndoomuka ndechiona chiemo chako. KuneMutungamiriri woKuemba. Nduyo yaDhavhidha, Muranda waMambo Mwari. Wakaemba KunaMambo Mwari mazwi enduyo iyi, apo Mambo Mwari wakamununura kubva kunyara dzemagaa ake eshe nokubva kunyara yaSauri.