Nduyo 16 - Bhaibheri Rakachena muChindau

¹ Ndingwarire, A Mwari, ngokuti ndinohwara mwouri.

² Ndinoti kunaMambo Mwari, “Iwewe ndiwe Mambo wangu; andina chakanaka ngepabanze pako.”

³ Ngendaa yevakacheneswa vari munyika, ndivo vakuru, kudakara kwangu kweshe kuri mwevari.

⁴ Avo vanotsara mwari umweni vanowandisa madambudziko avo. Midiro yavo yokumwa yengazi andizoidururi, nokuti kuronza mazina avo ngemiromo yangu.

⁵ Mambo Mwari uri chikoaniswa chenhaka yangu, nechetsani yangu; unogwinyisa nhaka yangu.

⁶ Bote rokupimisa randipimira ndau dzakanaka; ndinayo nhaka yakanaka.

⁷ Ndinokudza Mambo Mwari unondipanga; nepanguva dzousiku mwoyo wangu unondidzidzisa.

⁸ Ndinotungamidza Mambo Mwari pamberi pangu nguva dzeshe. Ngokuti uri ngokumudyo kwangu, andizotsukunuswi.

⁹ Ndizvo mwoyo wangu unodakara nomweya wangu unodakara; muiri wanguzve unozogara muugaro hwakangwaririka,

¹⁰ ngokuti iwewe auzosiyi mweya wangu muSheori, auzotenderizve Wakachena wako kuti awore.

¹¹ Unondionisa njira yokupona; mukuapo kwako kwakazara ngokudakara kweshe. Mumuoko wako wokumudyo muno kudakara kunoti mhera nariini. Mukumbiro waDhavhidha.